काठमाडौं । स्वास्थ्य तथा जनसंख्या मन्त्रालयले नेपालगञ्जस्थित भेरी अस्पतालमा कार्यरत स्वास्थ्यकर्मीमाथि साङ्घातिक आक्रमण गर्नेलाई कारवाही गर्न माग गरेको छ ।
मन्त्रालयका सहप्रवक्ता डा. समीरकुमार अधिकारीले आज विज्ञप्ति जारी गर्दै बिरामीको उपचारमा सम्लग्न स्वास्थ्यकर्मीमाथि भएको घटनाको भत्र्सना गर्दै घटनामा सम्लग्नलाई कारवाही गर्न माग गर्नुभएको छ ।
उहाँ घटनामा सम्लग्नलाई कोभिड–१९ संकट व्यवस्थापन अध्यादेश २०७८, मुलुकी फौजदारी कार्यविधि (सहित) ऐन २०७२,स्वास्थ्यकर्मी तथा स्वास्थ्य संस्था सुरक्षासम्बन्धि ऐन २०६६ अनुसार कडाभन्दा कडा कारवाही गर्न माग गर्नुभएको हो ।
यही जेठ १३ गते राती एक जना बिरामीको निधन भएपछि मृतकका आफन्तले स्वास्थ्यकर्मीमाथि आक्रमण गरेका थिए । उहाँले सङ्क्रमणको महामारीमा रोकथाम, नियन्त्रण र उपचारको सबभन्दा भरपर्दो सारथी स्वास्थ्यकर्मी भएकोले उनीहरुलाई उच्च मनोवलका साथ काम गर्ने सुरक्षित वातावरण बनाउन समेत अनुरोध गरेको छ ।
सहप्रवक्ता डा. अधिकारीले सङक्रमणको महामारीमा आफ्नो पेशागत मर्यादा नभुली काम गरिरहेका स्वास्थ्यकर्मी माथि आफ्नै कार्यस्थलमै साङघातिक हमला हुने खालका क्रियाकलाप दिनानुदिन हुँदै जानु लज्जास्पद भएको उल्लेख गर्नु भएको छ ।(रासस)
