पोखरा । पोखरास्थित गण्डकी प्रदेशको सबैभन्दा ठुलो सरकारी अस्पताल पश्चिमाञ्चल क्षेत्रीय अस्पतालमा अक्सिजन आपूर्ति बन्द हुँदा एक सुत्केरीसहित सात कोरोना सङ्क्रमितको निधन भएको छ ।
पोखरा स्वास्थ्य विज्ञान प्रतिष्ठान मातहतको सो अस्पतालमा बिहिबार राति ९ देखि १० बजेको अवधिमा अक्सिजन आपूर्ति पूर्ण रूपमा बन्द हुँदा उच्च गति (हाइफ्लो) अक्सिजनको सहायता र भेन्टिलेटरमा उपचार गराइरहेका बिरामीले ज्यान गुमाएका हुन् ।
बिहिबार रातीदेखि शुक्रबार बिहानसम्म अस्पतालको मेडिकल आइसोलेसनमा पाँच र डी क्यान्टिन आइसोलेसनमा दुई गरी सात सङ्क्रमितको निधन भएको अस्पतालको मेडिकल आइसोलेसनका फोकल पर्सन डा. डेभिट श्रेष्ठले जानकारी दिनुभयो ।
तनहुँकी सुत्केरी यही जेठ ५ गते कोरोना रिपोर्ट पोजेटिभ आएपछि ९ गते अस्पताल भर्ना हुनुभएको थियो । उहाँको अस्पतालमा शल्यक्रिया विधिबाट सुत्केरी गराइएकामा अक्सिजन सहायतामा उपचार भइरहेकामा हिजो निधन भएको बताइएको छ ।
डा. श्रेष्ठले भन्नुभयो– “प्लान्टमा उत्पादन कम भएर हो कि किन हो, हिजो दिउँसो ४ बजेदेखि नै अक्सिजन आउने रोकिने भइरहेको थियो । समयमा अक्सिजन नआउँदा हामीले सेन्ट्रल लाइनमा जोड्न सकेनौँ । राति ९ देखि १० बजेसम्म पूरै बन्द भयो । हाइफ्लो र भेन्टिलेटरमा बसेका बिरामीलाई आधा घण्टा वा एक घण्टा अक्सिजन नहुँदा अवस्था के होला ?”
प्रदेशको ठुलो सरकारी अस्पताल भए पनि पश्चिमाञ्चल क्षेत्रीय अस्पतलाको आफ्नै अक्सिजन प्लान्ट छैन । अस्पतालले पोखरा अक्सिजन ग्यास प्रालिसँग अक्सिजन आपूर्तिको सम्झौता गरेको छ ।
पछिल्लो समय अस्पतालमा कोभिडका बिरामी बढेसँगै अस्पतालको माग पनि उच्च छ । हाइफ्लोका बिरामीलाई अलिकति पनि अक्सिजन कमी हुनेबित्तिकै समस्या हुने चिकित्सक बताउँछन् । अस्पतालमा पटक पटक अक्सिजन आपूर्ति व्यवस्थापनमा समस्या देखिँदै आएको बताइन्छ । हालको अवस्थामा अस्पतालमा न्यूनतम २५० देखि ३५० सिलिन्डर आवश्यक पर्ने अस्पतालले जनाएको छ । पोखरामा रहेका दुई अक्सिजन कम्पनीले प्रदेशमा अक्सिजन आपूर्ति गर्दै आएका छन् ।
कोरोना सङक्रमित बढेसँगैै सरकारले पश्चिमाञ्चल अस्पताललार्ई कोभिड अस्पताल बनाउने निर्णय गरेको छ । स्वास्थ्य मन्त्रालयको सो निर्णयसँगै अस्पताल प्रशासनले कोभिड ओपिडीबाहेकका अन्य सबै ओपिडी सेवा बन्द गरेको छ । हाल ७० सैयामा कोरोनाका बिरामीको उपचार हुँदै आएकामा अस्पतालका ४०० हाराहारी सैयामा नै कोरोना उपचार गर्ने तयारी गरिएको छ । (रासस)
