काठमाडौं । सुदूरपश्चिम प्रदेशका प्रथम प्रदेश प्रमुख मोहनराज मल्लको उपचारका क्रममा निधन भएको छ । लामो समयदेखि निमोनियाको उपचार गराइरहनुभएका मल्लको काठमाडौंस्थित निदान अस्पतालमा आज बिहान ७ बजे निधन भएको मल्लका तत्कालीन स्वकीय सचिव धनसिंह साउदले जानकारी दिनुभयो ।
मल्ल नेपाली कांग्रेसका तर्फबाट सुदूरपश्चिम प्रदेशको पहिलो प्रदेश प्रमुख हुनुभएको थियो । कोरोना संक्रमणका कारण उहाँको निधन भएको आफन्तले बताएका छन् ।
कैलालीका पुराना राजनीतिज्ञका रुपमा चिनिँदै आएका मल्ल विसं. २०३७ देखि २०४६ सम्म राष्ट्रिय पञ्चायतका सदस्य हुनुभएको थियो । २०२८ सालमा डोटी बोगटान अन्तर्गत पण्डौन गाउँ पञ्चायतको प्रधानपञ्च, २०३२ सालमा कैलाली जिल्ला पञ्चायतको उपसभापति, २०४५ सालमा टीकापुर विकास समितिको अध्यक्ष, ०५२ सालमा परराष्ट्र मन्त्रालयको सल्लाहाकार र त्रिभुवन विश्वविद्यालयको सभासद बन्नुभएको थियो ।
चार दशकभन्दा बढीको समय कैलालीमा राजनीति गर्दै आउनुभएका मल्ल राष्ट्रिय पञ्चायत सदस्य हुँदै नेपाली कांग्रेसको महासमिति सदस्यसमेत हुनुभएको थियो । मल्ल २०७० सालको दोस्रो संविधानसभाअघि कांग्रेस प्रवेश गर्नुभएको थियो । विसं २०७४ माघ ३ गते प्रदेश प्रमुख नियुक्त हुनुभएका मल्लले माघ ८ गते शपथ लिनुभएको थियो ।
मल्लका एक छोरा र एक छोरी हुनुहुन्छ ।
