काठमाडौं । कुवेत नेपाली एकता समाजले प्रधानमन्त्री केपी ओली र राष्ट्रपति विद्या भण्डारीले संविधानका मूल्य र मान्यतालाई कुल्चिएर अधिनायकवादी कदम चालेको भन्दै आपत्ति जनाएको छ । समाजले सोमबार विज्ञप्ति प्रकाशित गरी प्रतिनिधि सभा विघटन तथा नागरिकतासम्बनिध अध्यादेश जारी भएको विषयप्रति ध्यानाकर्षण भएको जनाएको छ ।

अध्यक्ष निम बुढामगर र महासचिव खुम रायमाझीले प्रेशित गर्नुभएको विज्ञप्तिमा प्रधानमन्त्रीको अलोकतान्त्रिक, असंवैधानिक तथा निरंकुश कदमको भर्त्सना गरिएकोे छ ।

यस्तै, समाजले कोरोना महामारीको बीचमा देशलाई मध्यावधी चुनावमा धकेली जनताको जीवनसँग खेलवाड गरेको तथा विवादित नागरिकता विधेयकलाई अध्यादेशद्वारा जारी गरि भारतीय साम्राज्यवादलाई खुशी गराउने र आशिर्वाद प्राप्त गर्ने प्रयत्न गरिएको जनाएको छ ।

यस्तो छ वक्तव्य :
‘नेपालको वर्तमान राजनीतिक घटनाक्रमहरुले कुवेत नेपाली एकता समाजको ध्यानाकर्षण भएको छ । २०७७ पुष ५ गते प्रधानमन्त्री केपी शर्मा ओलीद्वारा गरिएको संसदको विघटन प्रतिगनको दिशामा चालिएको कदमलाई निरन्तरता दिंदै २०७८ साल जेठ ८ गते मध्य रात्रीमा केपी शर्मा ओलीद्वारा राष्ट्रपति समेतलाई दुरुपयोग गरि पुनः संसदको विघटन गराइएको छ । संविधानिक निकाय एवं जनताको अभिमत, लोकतान्त्रिक मुल्यमान्यतालाई कुल्चिंदै अध्यादेशद्वारा शासन चलाउने प्रयत्न भइरहेको छ । प्रधानमन्त्रीको अलोकतान्त्रिक, असंवैधानिक तथा निरंकुश कदमको हाम्रो संगठन घोर विरोध तथा भत्र्सना गर्दछ ।

देशमा वैश्विक महामारी कोरोनाका कारणले जनता त्रशित छन् । प्रवासमा पनि नेपाली श्रमिकहरुको स्थिति झन कष्टकर बनिरहेको छ । कोरोना महामारीले गर्दा देशको अर्थतन्त्र एवं आम जनजीवन अस्तव्यस्त छ । स्वास्थ्य क्षेत्रमा पनि सरकार पूर्णरुपमा असफल भएको छ । संक्रमण रोक्न गाउँ–शहर सबै तिर निषेधाज्ञा लगाउनु परेको छ । यो अवस्थामा सरकारले जनताको जीवन सुरक्षा गर्नको लागि युद्धस्तरमा कामगर्नु पर्ने अवस्यकता हो तर ओली सरकारले आफ्नो आन्तरिक दलिय कलहलाई समाधान गर्न नसकि नेपाली जनताको जनादेश प्रजातान्त्रिक मुल्यमान्यता सबैलाई कुल्चिंदै संसद भंग गरि देशलाई निरंकुशता तर्फ धकेलिरहेका छन् र ताजा जनादेशको नाममा कोरोना महामारीको बीचमा देशलाई मध्यावधी चुनावमा धकेली जनताको जीवनसँग खेलवाड गरेका छन् ।

संविधान अनुसार शासन व्यवस्था सञ्चालन हुनु पर्नेमा संसदबाट बहुमत गुमाईसके पछि पनि अध्यादेश मार्फत शासन चलाउने प्रयत्न गरिरहेका छन् । त्यसका लागि राजनीतिक सौदाबाजी गर्न पनि पछि परेका छैनन् । आफ्नै विगतका मुल्यमान्यता विपरित विवादित नागरिकता विधेयकलाई अध्यादेशद्वारा जारी गरि भारतीय साम्राज्यवादलाई खुशी गराउने र आशिर्वाद प्राप्त गर्ने प्रयत्न गरेका छन् । जसले देशको राष्ट्रियता माथि पनि खेलवाड गरका छन् । यतिवेला सबैभन्दा बढि राष्ट्रियता, गणतन्त्र, संविधान, धर्मनिरपेक्षता झन् खतरामा परेको छ । यो अवस्थामा देशमा लोकतान्त्रिक मुल्यमान्यता र संविधान अनुसारको शासन व्यवस्था वहालीको लागि ओलीको प्रतिगामी कदमका विरुद्ध संघर्षको विकल्प छैन । हाम्रो संगठन कुवेत नेपाली एकता समाज नेपालमा चलेको प्रतिगमन विरुद्धको आन्दोलनमा समर्थनका साथै ऐक्यवद्धता प्रकट गर्दछ ।’