खिमबहादुर विक, हैदरावाद ।
राष्ट्रिय जनमोर्चाका अध्यक्ष चित्रबहादुर केसीले बर्तमान सरकार संविधान च्यातचुत पार्न र सांसद खरिद बिक्री गर्न केन्द्रित भएको आरोप लगाउनुभएको छ ।
मूल प्रवाह अखिल भारत नेपाली एकता समाज मध्य दक्षिण क्षेत्रीय समितिको आयोजनामा भएको प्रशिक्षण कार्यक्रममा बोल्दै अध्यक्ष केसीले देश ‘रअ’ को डिजाइन अनुसार चलिरहेको दाबी गर्दै ओली सरकार एक पछि अर्को प्रतिगामी कदम चालिरहेको बताउनुभयो ।
‘देश भारतीय गुप्तचर संस्था ‘रअ’ को डिजाइन अनुसार चलिरहेको छ । ओली सरकार प्रतिगामी र स्वेच्छाचारी गतिविधि अगाडि बढाइरहेको छ’ केसीले भन्नुभयो, ‘केन्द्रमा सांसद खरिदबिक्री गर्न र संविधान च्यातचुत पार्न ओलीले गरेका क्रियाकलाप अहिले प्रदेशतिर सरेका छन् ।’
उहाँले जनताको ठूलो आन्दोलन र बलिदानले प्राप्त गणतन्त्र, धर्मनिरपेक्षता नै धरापमा पर्ने अवस्था आएको भन्दै त्यस्ता क्रियाकलापलाई रोक्न प्रजातान्त्रिक शक्तिहरु एकजुट हुनुपर्ने बताउनुभयो । उहाँले पार्टीले गरेको निर्णय गण्डकी प्रदेशका सांसदले उल्लंघन गरिदिँदा पार्टीलाई ठूलो धक्का पुगेको बताउनु भयो ।
उहाँले भन्नुभयो, ‘ओलीको प्रतिगामी कदम रोक्न पार्टीले गरेको निर्णय गण्डकीमा हाम्रै सांसदले उल्लंघन गरे । यसले गर्दा पार्टीको प्रतिष्ठामै धक्का लागेको छ ।’
उहाँले संगठन बिरोधी तत्वहरु अहिले सल्बलाउन थालेको र भारतमा पनि लाखौं नेपालीहरुको आस्थाको केन्द्र एकता समाजलाई पनि धमिल्याउन प्रयास गरिरहेको बताउनुभयो । तर एकता समाजका सचेत कार्यकर्ताले त्यस्ता तत्वलाई सफल हुन नदिने उहाँको विश्वास थियो ।
कार्यक्रममा राष्ट्रिय जनमोर्चाका महासचिव मनोज भट्टले पार्टीको तत्कालीन कार्यनीति र दीर्घकालीन रणनीतिको बारेमा स्पष्ट पार्नुभएको थियो ।
कार्यक्रममा मूल प्रवाहका केन्द्रीय अध्यक्ष दुर्गाबहादुर केसी, उपाध्यक्ष कपिल खनाल, केन्द्रीय सचिव प्रेम पौडेल र क्षेत्रीय सदस्य के रतन सिंह विश्वकर्माले पनि आफ्ना धारणा राख्नु भएको थियो ।
क्षेत्रीय अध्यक्ष रामप्रसाद पौडेलको अध्यक्षता, सचिव खिमबहादुर विकको सन्चालन र उपाध्यक्ष रुपलाल जिएमको स्वागतमा सो कार्यक्रम सम्पन्न भएको थियो ।
