बुटवल । लुम्बिनी प्रादेशिक अस्पताल बुटवलमा आईसीयू बेड कुर्दाकुर्दै ५ जना कोरोना संक्रमितको मृत्यु भएको छ । गएराति अस्पतालको इमर्जेन्सी वार्डमा बसेर आईसीयू बेड कुरिरहेकै बेला उनीहरुको मृत्यु भएको हो ।
मृत्यु हुनेमा मंगलबार इमर्जेन्सीमा आएका तानसेन–१४ पाल्पाका ३८ वर्षीय पुरुष, सैनामैना–७ रुपन्देहीका ३५ वर्षीय पुरुष, बुटवल–११ का ५२ वर्षीय पुरुष, तिलोत्तमा–६ की ७० वर्षीया महिला, तिलोत्तमा–१ का ५७ वर्षीय पुरुष र बुटवल–६ का ४४ वर्षीय पुरुष रहेका छन् ।
अस्पतालका प्रवक्ता डा विष्णु गौतमका अनुसार मृतकहरु मध्ये ५ जनाले कोरोना विशेष अस्पतालमा आईसीयू र एडीयू बेड कुरेर इमर्जेन्सी वार्डमा बसिरहेका थिए । विशेष अस्पतालमा बेड खाली नभएपछि उनीहरुको इमर्जेन्सीमै ज्यान गएको थियो ।
‘अक्सिजन नभई नहुने संक्रमितलाई घर पठाउन पनि नमिल्ने र बेड दिन पनि नसकिने अवस्था आयो’ डा. गौतमले भन्नुभयो ।
आज मृत्युको संख्या थपिएसँगै रुपन्देहीमा मृत्यु हुनेको संख्या २९९ पुगेको छ । अहिले पनि अस्पतालमा क्षमताभन्दा दोब्बर बिरामी राखेर उपचार गर्नुपरेको र छिनछिनमा हुने अक्सिजन अभावले समस्या परेको चिकित्सकको भनाई छ ।
