काठमाडौँ । कोरोना भेरियन्टले महामारीको रूप लिइरहेका बेला प्रगतिशील लेखक सङ्घले विज्ञ चिकित्सक डा. रवीन्द्र समीर पाण्डेसित अन्तरक्रिया कार्यक्रम सम्पन्न गरेको छ ।
प्रलेस केन्द्रीय कार्यालयको आयोजनामा भर्चुअल माध्यमबाट २०७८ वैशाख २६ गते साँझ ५ः३० बजे सो कार्यक्रम सम्पन्न भएको हो ।
कार्यक्रममा कोरोनाबारे मन्तव्य राख्दै डा. रवीन्द्रले कोभिड–१९ को पहिलो रूपभन्दा अहिलेको कोरोना भेरियन्ट खतरनाक रहेको बताउनुभयो । कोरोना भाइरसले रूप परिवर्तन गरी महामारी फैलाइरहेको बताउँदै उहाँले अहिले ब्राजिल र अफ्रिकामा फैलिएको कोरोना भेरियन्ट तुलनात्मक रूपमा बढी खतरनाक रहेको बताउनुभयो ।
अहिलेको कोरोना भेरियन्ट पहिलेको भन्दा सात गुणा छिटो फैलिने र १ प्रतिशतको हाराहारीमा मृत्युदर रहेको बताउँदै उहाँले यसले सङ्क्रमण भएको छैटौँदेखि दशौँ दिनसम्म कोभिड निमोनिया बनाउने गरेको बताउनुभयो ।
युवातप्कालाई पनि चपेटामा लिएको कोरोना भेरियन्टप्रति उच्च सकर्तता कायम राख्न उहाँले आग्रह गर्नुभयो ।
९० भन्दा कम अक्सिजन लेभल भएकाहरू अस्पताल जानुपर्ने अनिवार्य रहेको उल्लेख गर्दै उहाँले सङ्क्रमण दर सात गुणा बढी भएकाले अस्पतालमा बेड नपाएकोमा गुनासो नगर्न अनुरोध गर्नुभयो ।
‘बरु चौरमा बसेर भए पनि अस्पतालको निगरानीमा उपचार गराऔँ’ उहाँले भन्नुभयो– ‘यस्तो बेलामा बेड पाउनका लागि जिद्दी नगरौँ, बेड पाइएन भनेर गुनासो नगरौँ ।’
त्यस्तै उहाँले राती १ बजेदेखि बिहान ४ बजेसम्म विश्वमा सर्वाधिक मृत्यु हुने गरेको तथ्याङ्क प्रस्तुत गर्दै यो अवधिमा पनि अक्सिजनका लेभल जाँच गर्न ध्यानाकर्षण गराउनुभयो ।
मन्तव्यको क्रममा कोरोना खोपको बारेमा अनावश्यक भ्रम नपाल्न उहाँले आग्रह गर्नुभयो । कोरोनाको दुई मात्रा लगाएकाहरू ९० प्रतिशत सुरक्षित रहेको तथा एक मात्रा खोप लगाएकाहरू पनि ६२ प्रतिशत सुरक्षित रहने उल्लेख गर्दै उहाँले खोप लगाउन सबैसित आग्रह गर्नुभयो ।
‘पहिले सङ्क्रमित भइसकेका र खोप लगाइसकेकाहरू तुलनात्मक रूपमा सुरक्षित छन्’ उहाँले अहिले कोरोना नियन्त्रण गर्न खोपको विकल्प नभएको बताउनुभयो ।
विश्वका महामारीहरू सरदर तीन वर्षसम्म चल्ने गरेको स्मरण गर्दै उहाँले कोरोनाले पनि न्यूनतम तीन वर्षसम्म रूप परिवर्तन गरी–गरी सङ्क्रमण फैलाउन सक्ने उहाँको भनाइ थियो ।
‘सङ्क्रमित मान्छेको मृत्यु भएर, रूप परिवर्तन हुँदा सङ्क्रमण क्षमता कमजोर भएर, खोप लगाएर र मानिसहरूको सुरक्षा सतर्कताका कारण अन्ततः यो महामारी समाप्त भएर जाने छ’ उहाँले तबसम्मका लागि उच्च सुरक्षा सतर्कता अपनाउन र खोप लगाउन आग्रह गर्नुभयो ।
मानसिक रूपमा स्वस्थ हुँदा जुनसुकै रोक पनि नियन्त्रण गर्न सकिने उल्लेख गर्दै उहाँले तनाव व्यवस्थापनमा गम्भीरतापूर्वक ध्यान दिइनुपर्ने बताउनुभयो ।
कोरोना महामारी प्राकृतिक भएको बताउँदै उहाँले अहिले तीव्र विकासमाझ मानिस र जीवजन्तुको प्राकृतिक बसोबास बिथोलिएकाले यस खालको महामारी आउने गरेको बताउनुभयो ।
उहाँले चमेरोबाट, सालकमा र सालकबाट मानिसमा यो रोग सर्ने गरेको निस्कर्ष पछिल्लो खोजमा देखिएको बताउनुभयो ।
मन्तव्यको क्रममा उहाँले धुम्रपान र मध्यपानले कोभिड सङ्क्रमण अरू गम्भीर हुने बताउनुभयो ।
‘धुम्रपानले फोक्सोलाई हानी गर्छ, कोरोनाले पनि फोक्सोमै आक्रमण गर्छ’ उहाँले भन्नुभयो– ‘मेरो विनम्र आग्रह छ, धुम्रपान र मध्यपान आजैदेखि त्यागौँ ।’
कार्यक्रम प्रलेसका अध्यक्ष प्रा.डा. जीवेन्द्र देव गिरीको अध्यक्षता तथा महासचिव समीर सिंहको सञ्चालनमा सम्पन्न भएको थियो ।
सो अवसरमा कृष्ण केसी, खिमराज चालिसे, बिनु खुसी, केशव आचार्य, मनोज जिसी, दलबहादुर गुरुङ र केशव थापाले डा. रवीन्द्र समीरसित जिज्ञासा राख्नुभएको थियो ।
कार्यक्रमका फेसबुक लाइभ लिङ्कमा जानुहोस् ।
https://www.facebook.com/samir.singh.92798/videos/10226594719561274
