खिमराज चालिसे, चंडिगढ ।
नेपाल कम्युनिष्ट पार्टी (मसाल) का प्रवक्ता रामप्रकाश पुरीले सिद्धान्त र विचारका अगाडि अरु सबै समस्या गौण हुने बताउनु भएको छ ।
२०४औँ मार्क्सदिवशको सन्दर्भमा बुधबार मूल प्रवाह अखिल भारत नेपाली एकता समाजले आयोजना गरेको ‘आजको राजनैतिक अवस्थामा मार्क्सवादको महत्व’ विषयम कार्यक्रमलाई सम्बोधन गर्दै प्रवक्ता पुरीले मार्क्सवादीहरु चुनौतीको सामना गर्दै सिद्धान्तको रक्षा र संगठन निर्माण गर्छन् भन्नुभयो ।
उहाँले भन्नुभयो, ‘मार्क्सवादीहरु चुनौतीहरुको विरुद्ध संघर्ष गर्दै सिद्धान्तको रक्षा र संगठन निर्माणको जिम्मेवारी पुरा गर्न प्रयास गरिरहेका हुन्छन् ।’
प्रवक्ता पुरीले द्वन्द्वात्मक भौतिकवादको पद्बती अनुसार क्रान्ति र परिवर्तनका लागि ऐतिहासिक भौतिकवादी सिद्धान्तमाथि आधारित हुनुपर्ने मार्क्सवादी दृष्टिकोणलाइ स्पष्ट पार्नुभयो ।
वर्ग संघर्ष र सर्वहारा अधिनायकत्वको महत्वबारे स्पष्ट पार्दै प्रवक्ता पुरीले वैचारिक भड्काव र संगठनात्मक पद्धतिको उल्लंघन गरी गुटबन्दी गर्नेहरुविरुद्ध कठोर बन्नुपर्ने बताउनुभयो ।
कार्यक्रम मूल प्रवाहका अध्यक्ष दुर्गाबहादुर केसीको अध्यक्षता तथा उपाध्यक्ष कपिल खनालको सञ्चालनमा सम्पन्न भएको थियो । कार्यक्रमको विषयवस्तु प्रस्तुतसहित महासचिव ठाकुर खनालले स्वागत गर्नुभएको थियो ।
कार्यक्रममा श्याम तरामु, रमेश विक, दशरथ विक, बिनबहादुर केसी, जनक बिसि, नेत्रलाल शर्मा लगायतका सहभागीहरुको प्रश्न र जिज्ञासालाई प्रवक्ता पुरी तथा मूल प्रवाहका नेताहरुले स्पष्ट पार्नुभएको थियो ।
