लक्षीराम आचार्य, अत्तरिया ।
राष्ट्रिय जनमोर्चाका नेता हरिकृष्ण पाण्डेले आफ्नी आमाको सम्झनामा कैलालीको एक विद्यालयमा अक्षयकोष स्थापना गर्नुभएको छ । नेता पाण्डे र उहाँकी पत्नी कुन्ती पाण्डेले आमा जयकौरा पाण्डेको स्मृतिमा सुदूरपश्चिम माध्यमिक विद्यालय अत्तरियामा अक्षयकोष स्थापना गर्नुभएको हो ।

आमा जयकौराको निधन भएको ७ औँ दिनमा शुक्रबार आयोजित श्रद्धाञ्जली कार्यक्रममा पाण्डे दम्पतीले ५० हजार रुपैयाँको ‘जयकौरा स्मृति अक्षयकोष’ स्थापना गरी विद्यालयका प्रधानाध्यापक नगेन्द्र नाथलाई चेक हस्तान्तरण गर्नुभयो ।

मृतककी बुहारी कुन्ती पाण्डेको सभापतित्वमा भएको कार्यक्रममा राष्ट्रिय जनमोर्चाका केन्द्रीय सदस्य नन्दराज भट्ट, मृतकका छोरा हरिकृष्ण पाण्डेय, सुदूरपश्चिम माविका प्रधानाध्यापक नगेन्द्र नाथ, शिक्षक सालिभान साउदलगायतले श्रद्वाञ्जली अर्पण गर्नुभएको थियो । कार्यक्रमको सञ्चालन राजमो नेता लक्षिराम आचार्यले गर्नुभएको थियो । पाण्डेले आमाको निधनपछि परम्परागत ढंगको काजकिरिया गर्नुभएको छैन ।