काठमाडौं । गएको २४ घण्टामा नेपालमा तीन हजार १२२ जनामा संक्रमण पुष्टि भएको छ । पीसीआर विधिबाट ९ हजार २९२ र एन्टिजेन विधिबाट ७८६ जनामा परीक्षण गर्दा सो संख्यामा संक्रमित भेटिएका स्वास्थ्य तथा जनसंख्या मन्त्रालयले जनाएको छ ।
काठमाडौं उपत्यकामा भक्तपुरमा ९६, ललितपुरमा २७० र काठमाडौंमा ११ सय ३२ गरी १४ सय ९८ जनामा संक्रमण देखिएको छ ।
कोरोना संक्रमणबाट सक्रिय संमितको संख्या बढ्दै गएको छ । आज देशभर १९ हजार ३८२ जना सक्रिय संमित रहेका मन्त्रालयले जनाएको छ । आइतबार गरेको नियमित प्रेस ब्रिफ्रिङका क्रममा पछिल्लो समय कोरोना संक्रमणबाट सिकिस्त बिरामीको संख्या बढ्दै गएको छ ।
यही क्रममा बिरामीको संख्या बढ्दै गए आईसीयू र भेन्टिलेटरको अभाव हुने मन्त्रालयले जनाएको छ । सेल्फ आइसोलेसनमा बस्न र सावधानी अपनाउन पनि मन्त्रालयले आग्रह गरेको छ ।
२४ घण्टामा २८ जनाको मृत्यु
गएको २४ घण्टामा नेपालमा कोरोना संक्रमणका कारण २८ जनाको मृत्यु भएको छ । स्वास्थ्य तथा जनसंख्या मन्त्रालयका अनुसार गत २४ घण्टामा २८ जनाको मृत्यु भएको विवरण प्राप्त भएको छ भने यो अवधिमा १६ जनाको ज्यान गएको छ ।
यो सहित नेपालमा कोरोनाका कारण मृत्यु हुनेको संख्या ३१ सय ६४ पुगेको छ । आज देशभर १८० जना आईसीयूमा भर्ना भएकामा ४७ जना भेन्टिलेटरमा उपचार गराइरहेका मन्त्रालयले जनाएको छ ।
गएको २४ घण्टामा ४५० संक्रमित निको भएर घर फर्किएका छन् ।
