जनकराज पौडेल, दक्षिण भारत ।
मूल प्रवाह अखिल भारत नेपाली एकता समाजले भारतमा मिर्गौला रोगका कारण मृत्यु भएका एक नेपालीको परिवारलाई आर्थिक सहयोग गरेको छ । दक्षिण भारत क्षेत्रीय समिति अन्तर्गत निलगिरि नगर समितिले आर्थिक संकलन गरि भारु ५५ हजार २३६ रुपैयाँ मृतकका परिवारलाई हस्तान्तरण गरेको हो ।
पर्वत जिल्लाको मल्लाज माजफाट जलजला गाउँपालिका वडा न. ४, का गनबहादुर परियारको छोरा ४२ वर्षीय गुप्तबहादुर परियारको मिर्गौलामा देखिएको समस्याका कारण मृत्यु भएको हो । उहाँ लामो समयदेखि निलगिरी उटि हाटस्कालेजमा चौकीदार गर्दै आउनुभएको थियो ।
सन् २०१८ देखि उहाँको दुवै मिर्गौलाले काम नगरेकाले आर्थिक सहयोग संकलन गरि उपचार गरिएको थियो । उपचार गर्दागर्दै अप्रिल १३ तारिखका दिन उनको मृत्यु भएको थियो । मूल प्रवाह नगर समितिको रोहवरमा परियारको दाहसंस्कार गरिएको थियो ।
स्वर्गीय गुप्तबहादुर परियार निलगिरी नगर समितिका सदस्यसमेत हुनुहुन्थ्यो । एक कुशल कार्यकर्ताको निधनले संगठनलाई क्षति पुगेको मूल प्रवाहले जनाएको छ ।
परियारको पार्थिक शरिरमा मूल प्रवाह अखिल भारत नेपाली एकता समाज दक्षिण भारत क्षेत्रिय समितिका सदस्य विरे थापा र प्रतिनिधि जगत हमाल ले संगठनको झण्डा ओढाई सम्मान साथ श्रद्धाञ्जली गरिएको थियो।
उहाँकी श्रीमति लक्ष्मि परियार र जेठान भिमबहादुर परियारलाई मूल प्रवाहका क्षेत्रीय सदस्य बिरे थापा र प्रतिनिधि जगतबहादुर हमालले सहयोग रकम हस्तान्तरण गर्नुभयो ।
स्मरणीय छ, यस भन्दा पहिला पनि गुप्तबहादुर परियारको उपचार खर्चको लागि भारुएकलाख २० हजार निलगिरि नगर समितिको रोहवरमामा आर्थिक संकलन गरि सहयोग गरिएको थियो ।
