काठमाडौं । प्रधानमन्त्री केपी शर्मा ओलीले बालुवाटारमा रहेका राम र सीताका मुर्ति आज (मंगलबार) चितवनको अयोध्यापुरी पठाउनुभएको छ । अयोध्यापुरीमा स्थापना गरिने राम, सीता, लक्ष्मण र हनुमानका मूर्तिलाई बालुवाटारमा विधिवत् पूजा गरि चितवन पठाइएको हो ।
प्रधानमन्त्री निवासबाट मुर्तिहरु रथयात्रा गरी राष्ट्रपति कार्यालय पुर्याइएको थियो । राष्ट्रपति कार्यालयमा राष्ट्रपति विद्यादेवी भण्डारीले एक समारोहबीच प्रतीमासहितको रथयात्रालाई विदाई गर्नुभएको थियो ।
मूर्ति लिएर गएको रथ आज चितवनको देवघाट रहनेछ । भोलि बिहान माडीको अयोध्यापुरी लगिनेछ । अयोध्यापुरीमा निर्माण गरिएको मन्दिरमा रामनवमीको दिन प्राणप्रतिष्ठा गरेर मूर्तिहरु राख्ने कार्यक्रम रहेको छ ।
प्रधानमन्त्री केपी ओलीले केही समयअघि ‘भगवान रामको जन्म चितवनको ठोरीमा भएको’ भनेपछि नेपाल र भारतमा त्यसको तरंग उत्पन्न भएको थियो । त्यसयता सरकारले अयोध्यापुरीमा राम मन्दिर बनाउन लगाउनुका साथै काठमाडौंमा राम–सीताको मुर्ति बनाएर प्रधानमन्त्री निवासमा राखेको थियो । सोही मुर्ति आज अयोध्यापुरी पठाइएको हो ।
