काठमाडौं । नक्कली शैक्षिक योग्यताको प्रमाणपत्र पेश गरी चिकित्सक बनेका सात जनालाई प्रहरीले पक्राउ गरेको छ । प्रहरीको केन्द्रीय अनुसन्धान ब्यूरो (सीआईबी) ले सात जना नक्कली चिकित्सकलाई पक्राउ गरी सोमबार सार्वजनिक गरेको हो ।
पक्राउ पर्नेमा सप्तरीको बिष्णुपुरा गाउँपालिका–२ का २८ वर्षीय मोहम्मद सिद्दिक, महोत्तरी सरपल्लो–६ का २९ वर्षीय सुभाष प्रसाद साह, धनुषा सबैला–२ का २८ वर्षीय मोहम्मद साहिद राजा, मनाङको साविक चामे गाविस–५ का ३१ वर्षीय दिपेन्द्र गौतम, सप्तरीको शंकरपुरा–१ का ३१ वर्षीय अखिलेशकुमार देव, महोत्तरीको मनरा–५ की २७ वर्षीया पल्लवी सिंह र ललितपुर सानेपाका २९ वर्षीय फराज हुसेन खाँ रहेका छन् ।
पक्राउ परेका मोहम्मद सिद्दिक न्यूरो हस्पिटल विराटनगरमा कार्यरत थिए भने दीपेन्द्र गौतम चौरजहारी अस्पताल रुकुम पश्चिम, मोहम्मद साहिद राजा दीर्घायू गुरु हस्पिटल चाबहिल र शुभाष साह जनकपुर चिल्ड्रन हस्पिटल धनुषामा कार्यरत रहेका सीआईबीले जनाएको छ ।
आरोपीहरुले चिकित्सा विज्ञान अध्ययनका लागि आवश्यक पर्ने एसएलसीको मार्कसिटमा आवश्यक न्यूनतम योग्यता नपुग्ने भएपछि नाम, जन्ममिति, प्राप्तांकलगायतका विवरण सच्याएर मेडिक काउन्सिलबाट प्रमाणपत्र लिएर बंगलादेशमा मेडिकल शिक्षा अध्ययन गर्न गएको अनुसन्धानका क्रममा खुलेको छ ।
नक्कली प्रमाणपत्र पेश गरेर चिकित्सक बनेको आशंकामा उनीहरुलाई प्रहरीले फरक–फरक स्थानबाट पक्राउ गरेर काठमाडौं ल्याइएको सीआईबीले जनाएको छ।
उनीहरुले बंगलादेशमा चिकित्सा शिक्षा अध्ययनका लागि नक्कली प्रमाण पत्र पेश गरेर मेडिकल काउन्सिलको प्रमाणपत्र लिएको प्रहरीको केन्द्रीय अनुसन्धान ब्युरोको अनुसन्धानले देखाएको छ ।
