मेघराज रिष्मेली, जापान ।
सडक निर्माणका क्रममा डोजरको ठक्करबाट गम्भीर घाइते भएका बागलुङको गलकोट नगरपालिका–८ काँडेबासका यमलाल उपाध्याय (रामु) को उपचारका लागि काँडेबास सेवा समाज जापानले आर्थिक सहयोग गरेको छ ।
समाजका सचिव बिपीन केसीका अनुसार जापानमा रहेर विभिन्न पेशा व्यवसाय गरिरहेका नेपालीहरुले संकलन गरेको सात लाख १४ हजार पाँच सय रुपैयाँ पीडितलाई प्रदान गरिएको छ ।
सो रकम वैशाख ३ गते (शुक्रबार) गल्कोट नगरपालिका वार्ड नम्बर ८ का अध्यक्ष रामप्रसाद कँडेलमार्फत उपाध्यायलाई हस्तान्तरण गरिएको हो ।
कॉडेबास चालिसेटोला निवासी पूर्णभद्र उपाध्यायका छोरा ३७ वर्षीय रामु गत माघ महिनामा मोटरबाटो खन्ने क्रममा डोजरले ठक्कर दिएपछि गम्भीर घाइत हुनुभएको थियो । माघ २५ गते चरक मेमोरियल अस्पतालमा भर्ना भएका रामुको सोही अस्पतालमा उपचार भइरहेको छ ।
काँडेबास सेवा समाज जापानको आव्हानमा यहाँ रहेका १८७ नेपालीले सो रकम सहयोग गरेका हुन् । सहयोगी सबैप्रति समाजले कृतज्ञता व्यक्त गरेको छ ।
