काठमाडौं । स्वास्थ्य तथा जनसंख्या मन्त्रालयले विद्यालय लगायत भीडभाड हुने सबै क्षेत्र बन्द गर्न कोभिड—१९ संकट व्यवस्थापन केन्द्र (सीसीएमसी) लाई सिफारिस गरेको छ । पछिल्लो समय कोरोना भाइरसका नयाँ भेरिएन्ट स्कुले बालबालिकाहरूमा देखिएको भन्दै मन्त्रालयले विद्यालय बन्द गर्न सिफारिस गरेको हो ।
भारतमा हाल संक्रमणको दोस्रो लहर तीव्ररूपमा फैलिएको र नेपालमा पनि संक्रमणको दोस्रो लहरको संकेत देखिन थालेपछि स्वास्थ्य मन्त्रालयले भिडभाड हुने सबै क्षेत्र बन्द गर्न सीसीएमसीलाई सिफारिस गरेको मन्त्रालयका सहप्रवक्ता समीरकुमार अधिकारीले बताउनुभयो ।
भिडभाड हुने रेष्टुरेन्ट, सिनेमा हल, पार्टी प्यालेस र विद्यालय लगायतका क्षेत्र बन्द गर्न मन्त्रालयले सिफारिस गरेको जनाएको छ । लामो समयसम्म बन्द रहेका विद्यालयमा केही महिनादेखि भौतिक रुपमा पठनपाठन सञ्चालन हुँदै आएको छ । आउँदो वैशाख–जेठमा विद्यालयहरुमा वार्षिक परीक्षा सञ्चालन हुँदैछ ।
स्वास्थ्य मन्त्रालयले चैत ५ गते एक सूचना प्रकाशित गरी रात्रीकालिन व्यवसाय राति नौ बजेपछि पूर्णरुपमा बन्द गर्न आग्रह गरेको थियो । संक्रमण बढ्दै गएको भन्दै बढी भिडभाड हुने शैक्षिक संस्था, यातायात, मन्दिर, सिनेमाघर, पार्टी प्यालेसलगायतका स्थानमा स्वास्थ्य मापदण्ड कडाइका साथ पालना गर्न सूचनामा जनाइएको थियो ।
