जनकराज पौडेल, (पाण्डिचेरी) ।
मूल प्रवाह अखिल भारत नेपाली एकता समाज पाण्डिचेरी नगर सदस्य श्रीकृष्ण खनाल र महिला विभाग नगर सदस्य माया खनाललाई प्रवासबाट विदाइ गरिएको छ । जिपमेर एरिया समिति र नगर समितिको संयुक्त आयोजनामा एक कार्यक्रम गरी जिपमेर एरिया अध्यक्षसमेत रहेका श्रीकृष्ण र महिला नेत्री माया खनालको विदाइ गरिएको हो ।
श्रीकृष्ण खनाल जागिरबाट अवकाश प्राप्तपछि सधैँको लागि स्वदेश जान लाग्नु भएको हो । खनाल सन् १९८३ देखि निरन्तर रुपमा संगठनका विभिन्न स्तरमा रही जिम्मेवारी सम्हाल्दै आउनु भएको थियो भने माया खनाल महिला विभागमा कार्यरत हुनुहुन्थ्यो।
कार्यक्रमलाई सम्बोधन गर्दै, मूल प्रवाह अखिल भारत नेपाली एकता समाज केन्द्रीय सचिव तथा नगर अध्यक्ष जनकराज पौडेलले पाण्डिचेरी नगरस्तरको सन्दर्भमा एक कूशल अभिभावकीय भूमिका निर्वाह गर्दै आउनु भएका खनालको रित्तता खड्किरहने बताउनुभयो । संगठनप्रतिको उहाँको निरन्तता र लगनशीलता हामी सबैका लागि अनुशरण गर्न आवश्यक रहेको धारणा व्यक्त गर्नु भएको थियो ।
विदाइ कार्यक्रममा शुभकामना दिनेहरुमा दक्षिण भारत क्षत्रीय समितिका डिल्लीप्रसाद शर्मा, नगर उपाअध्यक्ष नरबहादुर केसी, नगर सचिव गोविन्द शर्मा, सदस्य भद्रबहादुर जिसी, जिपमेर एरियाबाट बलबहादुर केसी, बमबहादुर केसीलगायत हुनुहुन्थ्यो । उहाँहरुले श्रीकृष्ण खनालले संगठनप्रति दिएको योगदान स्मरण गर्दै, बाँकी जीवन पनि देश भित्र गई राष्ट्रिय जनमोर्चामा काम गर्नु हुने छ भन्ने विश्वास व्यक्त गर्नु भएको थियो ।
उपस्थित सबैले उहाँहरुलाई दोसल्ला र अबीर लगाई सम्मान गर्नु भएको थियो ।
कोरोना भाइरस संक्रमणको जोखिमको परिस्थितिलाई मध्यनजर गर्दै श्री कृष्ण खनालको आग्रहमा सिमित साथीहरुबीच विदाइ गरिएको थियो ।
कार्यक्रमलाई सम्बोधन गर्दै श्रीकृष्ण खनाल र माया खनालले संगठनलाई धन्यबाद दिँदै आफूहरु स्वदेश गएर पनि राष्ट्रिय जनमोर्चामा आबद्ध हुने प्रतिबद्धता जाहेर गर्नु भएको छ । स्मरण रहोस् खनाल पहिला बाग्लुङ जिल्ला साविक जैदी गाविस वडा न. ८ निवासी हुनुहुन्थ्यो । अहिले पूर्वी चितवनको रत्ननगर नगरपालिका वडा नं १० टाँडीमा बसोबास गर्नु हुन्छ ।
कार्यक्रम जिपमेर एरिया सदस्य उमा केसीको अध्यक्षता, कृष्णप्रसाद शर्माको सञ्चालनमा सम्पन्न भएको थियो भने नगर सचिव गोविन्द शर्माले स्वागत गर्नु भएको थियो ।
