काठमाडौं । नेकपा (माओवादी केन्द्र) ले एमालेतिर लागेका आफ्नो पार्टीका चार प्रदेश सांसदलाई कारबाही गरेको छ ।
पार्टीले कारबाही गरेपछि लुम्बिनी प्रदेश सभाका सदस्यद्वय दधिराम न्यौपाने र दिनेश पन्थीले आजदेखि पद गुमाउने भएका छन् । यस्तै, प्रदेश १ का टंक आङ्बोहाङ र कर्णालीका धर्मराज रेग्मीलाई पनि पार्टीले कारबाही गर्दै छ ।
आज बस्ने लुम्बिनी प्रदेश सभा बैठकमा सभामुखले न्यौपाने र पन्थीलाई माओवादी केन्द्रले कारबाही गरेको पत्र पढेर सुनाउने र त्यससँगै दुवैको सांसद पद गुम्ने छ । योसँगै आजदेखि लुम्बिनी प्रदेश सभामा २ सांसद पद खाली हुने छ ।
माओवादी केन्द्र संसदीय दलले प्रदेश सभा सचिवालयमा न्यौपाने र पन्थी दलमा नरहेको सूचना दर्ता गराएपछि उनीहरूको निलम्बन प्रक्रिया अघि बढेको हो । राजनीतिक दलसम्बन्धी दफा ३४ मा जुन दलबाट निर्वाचित भएको हो, त्यो दल त्यागेपछि स्वतः सांसद पद जाने व्यवस्था छ ।
माओवादी केन्द्रको केन्द्रीय सदस्यसमेत रहेका न्यौपाने रूपन्देही क्षेत्र नम्बर १ को २ र दिनेश पन्थी गुल्मी निर्वाचन क्षेत्र नम्बर २ को २ बाट प्रत्यक्ष निर्वाचित सांसद हुन् ।
यता, माओवादी केन्द्रबाट निर्वाचित प्रदेश १ का प्रदेश सभा सदस्य टंक आङ्बुहाङलाई सांसद पदबाट मुक्त गर्ने निर्णय भएको छ । आङ्वुहाङ माओवादी पार्टी छाडेर एमाले प्रवेश गर्दै प्रदेश मन्त्री समेत बनेका थिए । यसअघि माओवादी केन्द्रले पार्टी त्याग गरेको भन्ने विषयमा स्पष्टीकरण मागेको थियो । उनले समयभित्र स्पष्टीकरण नदिएपछि पार्टीले कारबाही गरेको हो ।
यसैगरी कर्णाली प्रदेश सांसद धर्मराज रेग्मीको पनि सांसद पद गुम्दैछ । माओवादी केन्द्रबाट निर्वाचित रेग्मी एमालेमा प्रवेश गरेका थिए । अहिले उनी एमालेको केन्द्रीय सदस्य बनेका छन् ।
