काठमाडौँ । १२ पत्रकार सङ्गठनको माझमा सहकार्य गर्ने सहमति भइसकेपछि केन्द्रमा बाहेक अन्य समितिमा साझा प्यानल नबनेपछि प्रगतिशील पत्रकार सङ्घ काठमाडौँले एकल प्यानल मनोनयन दर्ता गर्ने घोषणा गरेको छ ।
प्रगतिशील पत्रकार सङ्घ काठमाडौँका अध्यक्ष प्रकाश थापामगरको हस्ताक्षरमा आज जारी प्रेसविज्ञप्तिमा पत्रकार महासङ्घ काठमाडौँ शाखामा केन्द्रीय सदस्य तथा महासङ्घका केन्द्रीय सदस्य गोपाल बराइलीको नेतृत्वमा एकल प्यानल दर्ता गर्ने घोषणा गरिएको हो ।
सकेसम्म अझै पनि १२ पत्रकार सङ्गठनमाझ साझा प्यानलका लागि कोसिस गर्ने तथा उनीहरूको निषेधात्मक रवैया यथावतै रहे गठबन्धनभन्दा बाहिर पनि वार्तासंवाद अगाडि बढाउने जानकारी दिइएको प्रेसविज्ञप्तिको पूर्ण पाठ यस्तो छ–
“प्रगतिशील पत्रकार सङ्घ काठमाडौँको २०७७ चैत २० गते सम्पन्न बैठकले गरेका निर्णयहरूको जानकारी दिन यो प्रेसविज्ञप्ति जारी गरिएको छ ।
१. नेपाल पत्रकार महासङ्घको आसन्न निर्वाचनमा प्रगतिशील पत्रकार सङ्घ, नेपालसहित १२ पत्रकार सङ्गठनमाझ २०७७ चैत १३ गते सहकार्य गर्ने निर्णय भएको थियो । तर सहकार्यको स्प्रिटअनुसार १२ पत्रकार सङ्गठनमाझ केन्द्रमा बाहेक अन्यत्र कुनै पनि समितिका लागि साझा प्यानल तयार पार्ने काम हुन सकेको छैन ।
२. कतिपय पत्रकार सङ्गठनको अन्य पत्रकार सङ्गठनप्रतिको निषेधात्मक नीति तथा कार्यशैलीका कारणले १२ पत्रकार सङ्गठनमाझ साझा प्यानल तयार गर्न नसकिएको प्रष्टै छ । यस खालको बाध्यात्मक परिस्थितिमा प्रगतिशील पत्रकार सङ्घ काठमाडौँले आसन्न चुनावमा भूमिका खेल्नुपर्ने दायित्व आइपरेको छ ।
३. उपर्युक्त नयाँ परिस्थितिमा हामीले एकातिर १२ पत्रकार सङ्गठनमाझ अझै पनि सहकार्यको स्प्रिटअनुसार साझा प्यानल तयार पार्ने प्रयास गर्ने छौँ भने अर्कातिर १२ पत्रकार सङ्गठनका कतिपय पत्रकार सङ्गठनको निषेधात्मक नीति तथा कार्यशैली यथावतै रहेमा त्यसभन्दा बाहिरका सङ्गठनसित पनि वार्तासंवाद र आपसी सहमतिअनुसार प्यानल निर्माण गर्ने छौँ ।
४. आसन्न निर्वाचनमा वार्तासंवादका लागि प्रगतिशील पत्रकार सङ्घ बागमती प्रदेशका अध्यक्ष रघुनाथ पौडेलको नेतृत्वमा वार्ता समिति गठन गरिएको जानकारी गराउन चाहन्छौँ ।
५. केन्द्र र प्रदेशको मनोनयन दर्ता भइसकेको अवस्थामा काठमाडौँ जिल्ला शाखाका लागि प्रगतिशील पत्रकार सङ्घका केन्द्रीय सदस्य तथा नेपाल पत्रकार महासङ्घका केन्द्रीय सदस्य गोपाल बराइलीको नेतृत्वमा एकल प्यानल मनोनयन दर्ता गराउने घोषणा गर्दछौँ ।”
