काठमाडौं । काठमाडौंं उपत्यकाको आकाश तुवाँलाले ढोकेको छ । शुक्रबार दिउसोदेखि आँखा पोल्ने तुवाँलेले आकाश ढाकेको छ । काठमाडौंमा घाम लागेको छैन भने हावा पनि चलेको छैन ।
वातावरणमा एक्कासी परिवर्तन आएपछि जनजीवन पनि प्रभावित भएको छ । वायुमण्डलमा वायुको गुणस्तर सूचकाङ्क अत्याधिक बढेका कारण तुवाँलो दोखिएको हो । वातावरण विभाग अन्तर्गतको वायु गुणस्तर मापन केन्द्रका अनुसार ललितपुरको भैंसेपाटीमा वायुको गुणस्तर सूचकाङ्क (एयर क्यालिटी इन्डेक्स) ४७०, भक्तपुरमा ३०५, कीर्तिपुरमा २२१ र उपत्यका बाहिर सिमरामा २४८ पुगेको छ ।
जल तथा मौसम विभागले डढेलो तथा अन्य प्रदुषणका कारण तुवाँलो लागेको जनाएको छ । भारतको विहार,उत्तर प्रदेशलगायतका राज्यबाट फैलिएको वायु प्रदुषणले नेपाली आकाश पनि ढाकेको हो ।
लामो समयको खडेरीले हावा सुख्खा भएको र वायुले धुवाँ र धुलो ल्याएका कारण काठमाडौंको वायु प्रदुषण भएको मौसमविदले जनाएका छन् । यस्तो बेलामा सकभर घरबाहिर ननिस्कन मौसमविदले सुझाव दिएका छन् ।
वायु प्रदुषणका कारण भिजिबिलिटी कम हुँदा त्रिभुवन विमानस्थलको ट्राफिक अस्तव्यस्त भएको छ । दिउँदा २ बजेदेखि भिजिबिलिटी कम हुँदा त्रिभुवन विमानस्थलमा जहाज अवतरण गर्न नसकेको विमानस्थलले जनाएको छ ।
