काठमाडौं । बलात्कारपछि हत्या गरिएकी बैतडीकी किशोरी भागरथी भट्टको स्वाबको डीएनएसँग अभियुक्त दिनेश भट्टको डीएनए मिलेको छ । भागरथीको शरीरबाट निकालिएको स्वाबसँग दिनेशको डीएनए रिपोर्ट मिलेको सुदूरपश्चिम प्रदेश प्रहरी कार्यालयले पुष्टि गरेको छ ।
प्रदेश प्रहरी प्रवक्ता (एसएसपी) मुकेश सिंहका अनुसार दिनेशको डीएनए रिपोर्ट भागरथीको शरीरबाट निकालिएको स्वाबसँग मिलेको हो । बैतडीको दोगडाकेदार गाउँपालिका–७, चडेपानीस्थित सनातन माध्यमिक विद्यालयमा अध्ययनरत् भागरथी गएको माघ २२ गते मृत अवस्थामा फेला परेकी थिइन् । उनको बलात्कारपछि हत्या भएको खुलेको थियो ।
अनुसन्धानको क्रममा प्रहरीले ५ फागुनमा भागरथीका छिमेकी तथा उनकै विद्यालयको कक्षा ११ मा पढ्ने दिनेशलाई अभियुक्तका रुपमा सार्वजनिक गरेको थियो। उनले प्रहरी, परिवारका सदस्य, सरकारी वकिल, अदालतमा अपराध स्वीकारेका थिए ।
पछिल्लो समय दिनेशले अपराध अस्वीकार गर्दै अन्य दुई जनामाथि आरोप लगाएका थिए । हाल उनी बाल सुधार गृहमा रहेका छन् ।
