माधव खनाल, अर्घाखाँची ।
मित्रकला स्मृति प्रतिष्ठानले अर्घाखाँचीको भूमिकास्थान नगरपालिका वडा नम्बर १ आम्बोटस्थित श्री आम्बोट आधारभूत विद्यालयका विद्यार्थीलाई शैक्षिक सामग्री प्रदान गरेको छ ।
विद्यालयमा स्थापना गरिएको ‘मित्रकला स्मृति प्रतिष्ठान’को आयोजनामा २०७६ सालको वार्षिक परीक्षामा उत्कृष्ट अंक ल्याउने दुईजना दलित छात्र/छात्रासहित चार जनालाई विद्यालयको ड्रेस र शैक्षिक सामग्री वितरण गरिएको हो ।
भूमिकास्थान, चौतारा निवासी स्वर्गीय खनालको वार्षिक पुण्यतिथिको अवसरमा आयोजित कार्यक्रममा उहाँका श्रीमान डासिराम खनालले विद्यार्थीलाई ती सामग्री हस्तान्तरण गर्नुभयो ।
कार्यक्रममा भूमिकास्थान नगरपालिका वडा नम्बर १ का वडा अध्यक्ष भोजराज खनालले स्वर्गीय मित्रकला खनालको परिवारले विद्यालयमा अक्षयकोष स्थापना गरेकोमा धन्यवाद दिनुभयो ।
यस्तै, अखिल नेपाल शिक्षक संघका केन्द्रीय सदस्य हिमलाल वेलवासेले अक्षयकोषले मानिस मरेर गए पनि युगौं युगसम्म नाम रहिरने बताउनुभयो ।
स्वर्गीय मित्रकला खनालका छोरा अर्थमन्त्रालयमा कार्यरत कर्मचारी तथा गितकार र गजलकार गोपालप्रसाद खनालले आफ्नी आमाले जिवित रहँदा आफू मरेर गए पनि आफ्नो नाममा विद्यालयमा अक्षयकोष स्थापना गर्ने चाहाना राखेको हुँदा आमाको चाहना र पुजा आजामा फजुल खर्च गर्नुभन्दा विद्यालयमा गरिव तथा जेहेन्दार विद्यार्थीहरुलाई सहयोग पुग्ने उद्देश्यले अक्षयकोष स्थापना गरिएको बताउनुभयो ।
कार्यक्रम शिक्षक चेतनारायण खनालले संचालन गर्नुभएको थियो ।
मित्रकला खनालको २०७६ साल फाल्गुन १९ गते ६९ वर्षको उमेरमा निधन भएको थियो । खनालका श्रीमान, तीन छोरा, पाँच छोरी, दुई बुहारी ज्वाइँ, नातिनातिना हुनुहुन्छ ।
