काठमाडौं । नेपाल र बंगलादेशबीच तीन दिनदेखि चलेको वाणिज्य सह सचिवस्तरीय वार्ता बुधबार सकिएको छ । नेपाल बंगलादेशबीच द्विपक्षीय व्यापार अभिवृद्धि गर्ने उद्देश्यले सोमबारदेखि काठमाडौंमा सहसचिव स्तरीय वार्ता भएको थियो ।
दुई पक्षीय वार्ताले नेपाल र बंगलादेशका ४ वटा निकाय बीच विभिन्न विषयमा समझदारी गर्ने निर्णय गरेको छ । सहमति अनुसार कृषि विभाग र बंगलादेशको कृषि प्रसार विभाग, खाद्य प्रविधि तथा गुण नियन्त्रण विभाग र बंगलादेशको सम्बन्धित निकाय, साल्ट ट्रेडिङ र ट्रेडिङ कर्पोरेशन आफ बंगलादेश, राष्ट्रिय खाद्य व्यवस्था तथा व्यापार कम्पनी र ट्रेडिङ कर्पोरेशन आफ बंगलादेशबीच दुईपक्षीय समझदारी गर्ने निर्णय भएको छ ।
यस्तै, क्वारेन्टाइन र एसपीएस अर्थात् सेनिटरी एण्ड फाइटोसेनिटरी सक्बन्धी दुईपक्षीय समझदारी गर्न दुईदेश सहमत भएका छन्। योवस्तुको बाह्य व्यापारका लागि खाद्य स्वस्थता र वनस्पति स्वास्थ्यसँग सम्बन्धित छ, यो विश्व व्यापार संगठनअन्तर्गतको एउटा नियम हो ।
वार्तामा नेपालको तर्फबाट उद्योग वणिज्य तथा आपूर्ति मन्त्रालयका सहसचिव नवराज ढकालले नेतृत्व गरेका थिए भने बंगलादेशको तर्फबाट वणिज्य मन्त्रालयका अतिरिक्त सचिव शरिफा खानले नेतृत्व गरेका थिए ।
