काठमाडौं । एक नेपालीले रसियन नागरिकसँग मिलेर ग्रिनकफीले मोटोपन घटाउँछ भन्दै ठगी गरेको पाइएको छ । प्रहरीको केन्द्रीय अनुसन्धान ब्युरो (सीआईबी)ले ठगीमा संलग्न नेपाली र विदेशी दुई जनालाई पक्राउ गरेको छ ।
पक्राउ पर्नेमा कास्कीको पोखराका ४२ वर्षीय आशिष आचार्य र रसियन नागरिक ३० वर्षीय इगर कुट्स रहेका छन् । उनीहरुले ग्रिन कफीले मोटोपन घटाउँछ भन्दै विज्ञापन गरेर ९६० रुपैयाँमा किनेको कफी २० देखि ४० हजार रुपैयाँसम्ममा बिक्री गरेको सीआईबीले जनाएको छ ।
उक्त कफी नियमित खाए एक हप्तामै १३ किलोसम्म तौल घट्ने भन्दै उनीहरुले ठगी गरिरहेको प्रहरीले बताएको छ । पक्राउ परेका व्यक्तिले बेच्न तयार गरेका सामान प्रहरीले बरामद गरेको छ । ग्रिन कफी ६ सय ४४ किलो, बेच्न तयारी अवस्थामा राखेको २ हजार ८ सय २२ प्याकेट, २५ थान ल्यापटप, सीपीयू २ थान र ३ लाख ९७ हजार रुपैयाँ बरामद भएको छ ।
उनीहरुले प्रतिकिलो ९६० रुपैयाँ नेपालकै विभिन्न भागबाट खरिद गरेर २० हजार देखि ४० हजार रुपैयाँसम्ममा बिक्री गर्ने गरेको पाइएको छ । टिम वान सप्लायर्स प्रालिको कार्यालय तथा गोदामबाट अन्यत्र गैरकानुनी रुपमा बेच्ने गरेको पाइएको सीआईबीले जनाएको छ ।
उनीहरुको भारत र रसियामा समेत कनेक्सन रहेको प्रहरीको अनुमान छ । कम्पनी आशिषको नाममा रहेको र ठगीमा रसियन इगरको पनि संलग्नता देखिएको प्रहरीले जनाएको छ ।
