सुर्खेत । कर्णाली प्रदेशको राजधानीको सुर्खेतको विकासका लागि जिल्लामा क्रियाशील विभिन्न राजनीतिक पार्टीहरुबीच छलफल भएको छ । बिहीबार राष्ट्रिय जनमोर्चाको आयोजनामा राजमो कार्यालयमा राजनीतिक दलहरुले छलफलको आयोजना गरेका हुन् ।
राष्ट्रिय जनमोर्चाका केन्द्रीय सदस्य रत्नविक्रम प्यासीको प्रमुख आतिथ्यतामा भएको छलफलमा स्थानीय बराहताल वडा नं १,२,४,का नागरिक समाज तथा युवाहरूको उपस्थिति थियो ।
कार्यक्रममा कर्णाली प्रदेशको राजधानी जोड्ने सडक सुर्खेत–मूलपानी –रानीघाट–तेलपानी–भुरीगाउ बर्दिया सडक निर्माण र रानीघाट पुल निर्माणको बिषय मा छलफल भएको थियो । सो छलफलमा पुल र सडक छिटो निर्माण कार्य अघि बढाउन दबाब सिर्जना गर्न जिल्ला सडक डिभिजन र जिल्ला प्रशासन कार्यालयमा ज्ञापन पत्र बुझाउने समझदारी भएको छ । उक्त पुल र सडक निर्माण तत्काल कार्यान्वयन नगरे दबाबमुलक आन्दोलन गर्ने निर्णय पनि गरिएको छ ।
छलफलमा राष्ट्रिय जनमोर्चाका नेता लालबहादुर नेपाली र महेन्द्रकुमार राना, नेकपाका ओमबहादुर महतारा र ईश्वरभक्त सुनार, नेपाली कांग्रेसका सन्तबहादुर वली, नेकपाका रेशम सुनारलगायत स्थानीय समाजसेवी बुद्धिजीवीहरूको सहभागिता रहेको थियो ।
