काठमाडौं । नेपालमा कोरोना संक्रमणबाट तीन हजार भन्दा बढीको मृत्यु भएको स्वास्थ्य तथा जनसंख्या मन्त्रालयले जनाएको छ । मन्त्रालयले बिहीबार विभिन्न क्षेत्रबाट प्राप्त सूचनाका आधारमा अपडेट गरेको तथ्यांक अनुसार आजसम्म मृत्यु हुनेको संख्या तीन हजार १० पुगेको हो ।

मन्त्रालयका अनुसार गएको २४ घण्टामा कोरोनाका कारण कसैको पनि मृत्यु भएको छैन भने हिजो एक जनाको ज्यान गएको थियो । यसअघि मंगलबार सार्वजनिक गरिएको तथ्यांक अनुसार २७ सय ७७ जनाको मृत्यु भएको उल्लेख छ ।

हालसम्म नेपालमा दुई लाख ७४ हजार ४८८ जना संक्रमित भेटिएकोमा दुई लाख ७० हजार ६८३ जना निको भइसकेका छन् । हालसम्म २१ लाख ७९ हजार ४७ जनाको पीसीआर परीक्षण गरिएको छ ।

नेपालमा गएको २४ घण्टामा १०७ जना नयाँ संक्रमित थपिएका छन् । जसमध्ये ८० पुरुष र ३७ जना महिला रहेका छन् ।