काठमाडौं । ललितपुरको नख्खुमा जिपले ठक्कर दिँदा एक छात्राको मृत्यु भएको छ । कोटेश्वर बहुमुखी क्याम्पसकी विद्यार्थी १९ वर्षीया अञ्जु दाहालको क्याम्पस जाँदै गर्दा बुधबार बिहान पौने ६ बजे स १ ज ५६७ नम्बरको जिपले ठक्कर दिँदा मृत्यु भएको हो ।

जिपको ठक्करबाट गम्भीर घाइते दाहालको उपचारका क्रममा पाटन अस्पतालमा मृत्यु भएको हो । सिन्धुपाल्चोक घर भई ललितपुरको बागडोलमा डेरामा बस्ने गरेकी अञ्जु कोटेश्वरको मल्टिपल क्याम्पसमा बीएड प्रथम वर्षमा पढ्थिन् ।

सडक पार गर्ने क्रममा उनलाई जिपले ठक्कर दिएको प्रत्यक्षदर्शीले बताएका छन् । घटनापछि जिप चालकलाई प्रहरीले पक्राउ गरेको छ ।

सहपाठीको मृत्युभएपछि कोटेश्वर बहुमुखी क्याम्पसका विद्यार्थी विरोधमा उत्रिएका छन् ।