पुष्कर भट्ट, कञ्चनपुर ।
मजदुरीको खोजीमा भारत पस्ने नेपालीहरुले पश्चिमी नाका गड्डाचौकीमा सास्ती ब्यहोर्नुपरेको छ । भारतीय सुरक्षा बल एसएसबीले नेपालीहरुलाई चेकजाँचका नाममा अनावश्यक झमेला दिने गरेको हो ।
एसएसबीले लामो समयसम्म लाइनमा लगाएर एकपटक ज्वरो नाप्ने र फेरि अर्को लाइन लगाएर इन्ट्रि गर्ने गरेको पीडितहरुले गुनासो गरेका छन् । लामो समयसम्म लाइनमा बस्नुपर्दा भोक र तिर्खाले सताउने हुँदा उनीहरुले त्यहाँ बेच्न राखिएको पानी तथा चाउचाउ, बिस्कुट महंगोमा किनेर खानुपर्ने बाध्यता छ ।
जंगल क्षेत्रमा लामो समइ लाइन लागेर बसेका कतिपयलाई भोलि आउनु भन्दै फर्काउने गरिएको उनीहरु बताउँछन् । नेपाल प्रवेश गर्ने भारतीयहरु सहजै आउने भएपनि नेपालीलाई अनेक हैरानी दिने गरिएको पीडितहरुको गुनासो छ ।
भीमदत्त नगरपालिकाले सिमानामा राखेको हेल्पडेस्कमा कार्यरत नगरपालिकाकी अनमि मनिषा खरेलले भारतबाट आउनेहरुलाई सामान्य ज्वरो नाप्ने गरिएको भएपनि नेपालबाट भारततर्फ जानेहरुलाई हैरानी दिने गरिएको बताउनुभयो । उहाँले उल्टै भारतीय मिडिाया नेपालमै आएर आफूहरुलाई दुःख दिने गरेको गुनासो गर्नुभयो ।
तर भारतीय सीमा सुरक्षा बल एसएसबीले भने नेपाली मिडियालाई सिमा पारी प्रवेश गरी फोटो खिच्नसमेत प्रतिबन्ध लगाएको छ ।
