काठमाडौं । जातीय समता समाज सुदूर पश्चिम प्रदेश सदस्य हर्क विकप्रति समाजले श्रद्धाञ्जली अर्पण गरेको छ । विकको यही फागुन १४ गते राति असामयिक निधन भएको थियो ।
२०२२ सालमा डोटीको जोरायल गाउँपालिका–४ मा जन्मनु भएका हर्क विक हाल कैलालीको गोदावारि नगरपालिका–१० मा बस्दै आउनु भएको थियो । उहाँ भारतमा सन् १९९५ देखि मूल प्रवाह अखिल भारत नेपाली एकता समाजमा आबद्ध भई राजनीतिमा क्रियाशील हुनुभएको थियो ।
हाल जातीय समता समाजको सुदूर पश्चिम समिति सदस्य तथा कैलाली जिल्ला सदस्य हुनहुन्थो भने राष्ट्रिय जनमोर्चा गोदावरी नगर समितिका अध्यक्ष रहनुभएको थियो । उहाँको आज शवयात्रासहित कैलालीको गोदावरी नदीमा अन्तिम संस्कार गरिएको छ
समाजका सुदूरपश्चिम प्रदेश अध्यक्ष एवम् केन्द्रीय सदस्य तिलक परियारले आइतबार एक विज्ञप्ति प्रकाशित गरी विकप्रति श्रद्धाञ्जली अर्पण गर्नुका साथै शोक सन्तप्त परिवारजनमा समवेदना व्यक्त गर्नुभएको छ ।
विज्ञप्तिमा भनिएको छ, ‘उहाँ संगठनमा अति अनुशासित र सक्रिय हुनुहुन्थ्यो । उहाँको निधनले जातीय समता समाज र सिंंगो दलित आन्दोलनलाई नै ठुलो क्षति पुगेको छ ।’
