महेन्द्रनगर । एक छात्रालाई निर्घात कुटपिट गरी घाइते बनाएका कञ्चनपुरको भीमदत्त नगरपालिका–९ मटैनास्थित बैजनाथ माध्यमिक विद्यालयका प्रद्यानाध्यापक खड्कसिंह विष्टलाई प्रहरीले पक्राउ गरेको छ ।
प्रधानाध्यापक बिष्ट पक्राऊ परिेपछि विद्यालय प्रशासनले गेटमै ताला लगाएको छ भने शिक्षकहरु विद्यालयमा आएका छैनन् । यता, विद्यार्थीहरुले पठन पाठन सुचारु गर्न माग गर्दै गेटको ताला तोडेर प्रदर्शन गरेका छन् ।
सोमबार प्राधानाध्यपक विष्टको कुटपिटबाट घाइते भएकी कक्षा नौ की १५ वर्षीया छात्रा मनिका नाथलाई उपचारका लागि महाकाली अस्पतालमा भर्ना गरिए पनि अवस्था जटिल भएका कारण थप उपचारका लागि कैलालीको धनगढीतर्फ लगिएको छ । छात्रा नाथको टाउकामा चोट लागेको छ ।
प्रअको कुटाइबाट घाइते छात्रा मनिका नाथ
छात्राका बुबा पदम नाथले विद्यालय गएकी छोरीमाथि प्रधानाध्यापक विष्टले कुटपिट गरी घाइते बनाएको बताउनुभयो ।
‘छोरी विद्यालय गएकी थिइन्’, उहाँले भन्नुभयो, ‘घर आउँदा बेहोस भइन् । अस्पताल ल्याएका छौँ, टाउकामा चोट लागेको छ ।’
छात्रामाथि कुटपिट गर्ने प्रधानाध्यापक विष्टलाई प्रहरीले नियन्त्रणमा लिएको छ। जिल्ला प्रहरी कार्यालय कञ्चनपुरका प्रहरी नायब उपरीक्षक अमरबहादुर थापाले छात्रामाथि कुटपिट गरेका प्रअलाई नियन्त्रणमा लिएर घटनाबारे अनुसन्धान भइरहेको बताउनुभयो ।
घटनाबारे विद्यार्थी संघसंगठन, महिला अधिकारकर्मीले विरोध जनाएका छन् । उनीहरूले घटनाको सत्यतथ्य छानबिन गरी दोषीउपर कारबाहीको माग अघि सारेका छन् ।
