धनगढी । राष्ट्रिय जनमोर्चाले बैतडीमा शंकास्पद मृत्यु भएकी किशोरी भागरथी भट्टको मृत्युबारे निष्पक्ष छानबिन गर्न माग गरेको छ । राजमो केन्द्रीय सदस्य एवम् सुदूरपश्चिम इन्चार्ज नन्दराज भट्टले शुक्रबार विज्ञप्ति प्रकाशित गरी घटनाको छानबिन गरी पीडितलाई न्याय दिलाउन माग गर्नुभएको हो ।
दोगडाकेदार गाउँपालिका–७ सिर्कोटस्थित सनातन धर्म माध्यमिक विद्यालयमा कक्षा १२ मा अध्ययरत १७ वर्षीया भट्ट बिहीवार साँझ स्थानीय लबलेक सामुदायिक वनमा मृत अवस्थामा भेटिएकी थिइन् ।
प्रहरीले शव बीच जंगलमा भेटिएको, शरीरभरि नीलडाम र घाउ रहेको तथा कपडा पनि च्यातिएको भन्दै घटना शंकास्पद रहेको जनाएको छ ।
भट्टको लागि न्यायको माग गर्दै शुक्रवार बैतडी, महेन्द्रनगरलगायतका स्थानमा विद्यार्थीहरुले प्रदर्शन गरेका छन् ।
पीडित पक्ष, स्थानीय र विद्यार्थी संगनठनले किशोरीको बलात्कार पछि हत्या भएको भन्दै घटनाको सत्य, तथ्य छानविन गरेर अपराधीलाई कानूनी दायरा ल्याउनु पर्ने माग गरेका छन्।
यसैबीच कञ्चनपुरमा क्रियाशील अखिल (छैटौं) लगायत विद्यार्थी संगठनहरुले विज्ञप्ति प्रकाशित गरी घटनाको छानविन र दोषीमाथि कारबाहीको माग गरेका छन् ।
