काठमाडौं । नेपालमा हालसम्म एक लाख ५८ हजार भन्दा बढीले कोरोना खोप लगाएका छन् । कोभिड–१९ खोप अभियान अन्तर्गत आज (बिहीबार) अपरान्ह ४ बजेसम्म एक लाख ५८ हजार ४८७ जनाले खोप लगाएका स्वास्थ्य तथा जनसंख्या मन्त्रालयले जनाएको छ ।

मन्त्रालयले दिएको जानकरी अनुसार ७७ वटै जिल्लाका २०१ खोप केन्द्रहरुबाट सो संख्यामा खोप लगाइएको हो ।

प्रदेश नं १ मा २१ हजार ७५४, प्रदेश नं २ मा २१ हजार २८५, वागमती प्रदेशमा ५५ हजार ५०४, गण्डकीमा १७ हजार २६७, लुम्बिनीमा २३ हजार ७९८, कर्णालीमा आठ हजार ७२ र सुदूरपश्चिम प्रदेशमा १० हजार ९०७ जनाले खोप लगाएका मन्त्रालयले जनाएको छ ।

पहिलो चरणमा माघ २४ गते शनिबारसम्म खोप लगाइने पनि मन्त्रालयले जनाएको छ । सरकारले प्राथमिकताको आधारमा स्वास्थ्यकर्मी, सरसफाइकर्मी तथा कोरोना विरुद्ध उपचारमा संलग्न व्यक्तिहरुलाई खोप लगाइरहेको छ ।