कावासोती/चन्द्र सापकोटा ।
अखिल नेपाल किसान महासङ्घ (अप्फा) को नवलपुर जिल्ला समितिले माघ महिनाभरि विशाल जुलुस र सभा गर्ने निर्णय गरेको छ । २०७७ पुस १५ गते बसेको नवलपुर जिल्ला समितिको बैठकले सो निर्णय गरेको हो ।
बैठकद्वारा ओली सरकारले गरेको प्रतिनिधि सभा विघटनको भत्र्सना गर्दै विघटित प्रतिनिधि सभाको पुनस्र्थापनाको मागसहित किसानका मागलाई पूरा गराउन सशक्त आन्दोलन उठान गर्ने निर्णय गरेको बताइएको छ । बैठकमार्फत किसानका मागलाई लिएर आन्दोलनमा उत्रिरहेको किसान महासङ्घ (अप्फा) ले गाउँ र नगरपालिका स्तरमा पनि सभा र जुलुस गर्दै माघको दोस्रो हप्तामा गर्ने आन्दोलन सफल पार्न सबै तह र तप्काका जनतासँग अपिल पनि गरिएको छ । त्यसका साथै चार किसान सङ्गठनद्वारा गरिने किसान आन्दोलनलाई पनि सशक्त रूपमा उठाउने निर्णय गरिएको बताइएको छ ।
जिल्लाध्यक्ष भगिरथ भट्टराईको अध्यक्षतामा बसेको सो बैठकमा अखिल नेपाल किसान महासङ्घ (अप्फा) का अध्यक्ष भैरवराज रेग्मीले किसानको आन्दोलनले नै विघटित संसदको पुनस्र्थापना गर्न सकिने हुनाले किसानहरू खेतबारीबाट नै आन्दोलन हुनुपर्ने कुरामा जोड दिनुभएको थियो ।
२०६२–६३ सालको जनआन्दोलनले राजतन्त्रको अन्त गरेको स्मरण गर्दै ओली सरकारको असंवैधानिक र तानाशाही कमललाई परास्त गर्न सकिने कुरामा समेत उहाँले जोड दिनुभयो ।
बैठकले आन्दोलनका लागि आवश्यक तयारी र कतिपय सङ्गठनसम्बन्धी निर्णयहरू गरेको पनि जिल्लाध्यक्ष भगिरथ भट्टराईले जानकारी दिनुभएको छ ।
