ओली पक्षीय नेकपाको अवरोधका कारण प्रचण्ड–नेपाल पक्षको भेला अवरुद्ध भएको छ । प्रचण्ड–नेपाल पक्षले पार्टी कार्यालयमा आइतवार दिउँसो विस्तारित जिल्ला भेला राखेको थियो । तर ओली पक्षले भेला हुन दिएन ।
नेकपा दुई धारमा विभाजन भएको अवस्थामा विस्तारित भेलाका नाममा गुटगत भेला गर्न खोजिएको भन्दै ओली पक्षले आइतवार पार्टी कार्यालयमा तालाबन्दी गरेको थियो । प्रचण्ड–नेपाल समूहले गुटगत भेला गरेर पार्टी कार्यालय कब्जा गर्न खोजेको भन्दै ओली पक्षले तालाबन्दी गरेको थियो ।
त्यसपछि दुवै पक्षका कार्यकर्ताबीच धकेलाधकेल भएको थियो । सम्भावित भिडन्तलाई मध्यनजर गरी पार्टी कार्यालयमा ठूलो संख्यामा सुरक्षाकर्मी परिचालन गरिएको छ ।
नेकपा कञ्चनपुरका सचिव तथा सुदूरपश्चिम प्रदेश सभा सदस्य तारालामा तामाङले शनिबार सामाजिक सञ्जालमा लेख्दै महेन्द्रनगरस्थित पार्टी कार्यालयमा भेला आयोजना हुने भएकाले कार्यकर्तालाई सहभागी हुन आह्वान गरेका थिए ।
त्यस लगत्तै नेकपा कञ्चनपुरका अध्यक्ष वीरबहादुर थापा (पातल) ले त्यो सूचनालाई खण्डन गर्दै पार्टी दुई धारमा विभाजित भएको र निर्वाचन आयोगले कसैलाई आधिकारिकता नदिएको अवस्थामा पार्टीको कुनै कार्यक्रम आयोजना नगरिएको उल्लेख गरेका थिए । कञ्चनपुरमा जिल्ला अध्यक्ष विरबहादुर थापा ओली पक्षका हुन् भने सचिव तारा लामा प्रचण्ड–नेपाल पक्षका हुन् ।
नेता भीम रावलको उपस्थितिमा पार्टी कार्यालयमा भेला गर्न खोजेको प्रचण्ड–नेपाल समूहको भेला ओली पक्षको अवरोधका कारण विथोलिएको छ । असहज परिस्थितिका कारण आजको भेला रोकिएको सचिव लामाले बताए ।
