हेटौँडा । १२८औँ माओ जयन्तीको अवसरमा मकवानपुरमा क्रियाशील ९ वाम पार्टी एवम् संगठनको संयुक्त आयोजनामा ‘आजको सन्दर्भमा माओवाद कि माओबिचारधारा’ बिषयक विचार गोष्ठी आयोजना गरिएको छ ।
कार्यक्रममा राष्ट्रिय जनमोर्चाका केन्द्रीय कोषाध्यक्ष हिमलाल पुरीले लिखित कार्यपत्र प्रस्तुत गर्नु भएको थियो । कार्यपत्रमाथि विभिन्न सहभागीहरुले टिप्पणी गर्नुभएको थियो ।
शनिबार बागमती प्रदेशको राजधानी हेटौंडामा आयोजित कार्यक्रम नेकपा (मसाल), राष्ट्रिय जनमोर्चा, नेकपा (क्रान्तिकारी माओबादी), नेकपा (माओवादी केन्द्र), नेकपा (माले), नेपाल कम्युनिष्ट पार्टी, बैज्ञानिक कम्युनिष्ट पार्टी, देशभक्त जनगणतान्त्रिक मोर्चा, समाजबादी अध्ययन केन्द्रले संयुक्त रुपमा आयोजना गरेको हो ।
कार्यक्रममा नेकपा (माले) वैकल्पिक पोलिटब्युरो सदस्य पर्शुराम लामिछाने, वाम बुद्धिजिवीहरु नवराज शर्मा, सुशील मुडवरी, ऋषिराम पोख्रेल, नेकपा मकवानपुरका नेता माननाथ तिमिल्सिना, बैज्ञानिक कम्युनिष्ट पार्टी केन्द्रीय सदस्य गणेश रसाइली, राष्ट्रिय जनमोर्चा प्रदेश नम्बर २ का कोषाध्यक्ष शेरबहादुर कार्की, देशभक्त जनगणतान्त्रिक मोर्चा मकवानपुरका अध्यक्ष सन्देश लामा, अखिल नेपाल शिक्षक संघ मकवानपुरका अध्यक्ष कृष्णबहादुर बिष्ट, नेपाल शिक्षक महासंघ मकवानपुरका सहसचिव दिपक कार्की, मुस्लिम मुक्तिमोर्चाका कार्यबाहक केन्द्रीय अध्यक्ष सद्दाम हुसेन, अखिल क्रान्तिकारी गण्डकी प्रदेश इन्चार्ज मनकुमार न्यौपाने लगायत नेताहरुले मन्तव्य राख्नुभएको थियो ।
नेकपा (मसाल) मकवानपुरका प्रवक्ता रामहरी धितालले सञ्चालन गर्नुभएको विचार गोष्ठीको अध्यक्षता नेकपा (क्रान्तिकारी माओबादी) मकवानपुरका जिल्ला इन्चार्ज पारसले गर्नु भएको थियो । कार्यक्रममा हिजो मात्रै मृत्यु भएका माक्र्सवादी अद्ययता शशी शेरचन (स्वनाम साथी) प्रती श्रद्धा सुमन व्यक्त गरिएको थियो ।
