सञ्जाल शर्मा, बागलुङ ।
नेपाल कम्युनिष्ट पार्टी (मसाल)को सहायक संगठन अखिल नेपाल युवक संघले बागलुङको जैमिनीमा १२८औँ माओ जयन्ती मनाएको छ । युवक संघ जैमिनी नगरको आयोजनामा हाँडिकोट टापुमा वृहत् वनभोजसहित माओ जयन्ती मनाइएको हो ।
कार्यक्रमलाई सम्बोधन गर्दै अखिल नेपाल युवक संघका अध्यक्ष अनिलकिशोर घिमिरेले प्रधानमन्त्री केपि शर्मा ओलीले संसद विघटन गरि चालेको असंवैनिक कदमले देश संकटग्रस्त अवस्थामा पुगेको बताउदै संसद पुनर्स्थापना गर्न नसक्ने हो भने देशको राष्ट्रियता र गणतन्त्रमाथि खतरा पैदा हुने बताउनुभयो ।
उहाँले देशका सचेत युवाहरू जुझारु प्रकारले ओलीको गलत कार्यशैलीको विरुद्ध आन्दोलित हुनसमेत आग्रह गर्नु भयो । साथै उहाँले युवाहरु आफ्नो अधिकारको खोजी गर्दै देशमा भईरहेको चरम भ्रष्टाचार विरुद्ध सशक्त आन्दोलन गर्न तयार हुनुपर्ने समेत बताउनु भयो । माओले देखाएको बाटोमा अगाडि बढ्न आग्रह गर्दै युवाहरूवर्ग संघर्षको भट्टीमा खारिँदै र क्रान्तिकारी कदम अगाडि बढाउँदै समाजको नेतृत्व गर्न तयार हुनुपर्ने बताउनुभयो ।
कार्यक्रममा गण्डकी प्रदेशका प्रदेश मामिला सभापति तथा प्रदेश सभा सदस्य कृष्ण थापा, वामपन्थी नेता नरबहादुर पुनलगाएतका नेताहरूले राष्ट्रियता, गणतन्त्र, युवा आन्दोलन र देशको समसामयिक परिस्थिति लगायत माओत्सेतुङको भूमिका र योगदानबारे बोल्नुभएको थियो ।
कार्यक्रममा युवा नेता भिमसेन वन, संजाल शर्मा, किसान नेता बिरेन्द्र थापा, राजमो जैमिनीका अध्यक्ष डिलबहादुर श्रीस, जनजातिका नेता लालबहादुर थापा, रक्तिमका दानबहादुर थापा, अखिल (छैठौं)का दिपेन्द्र पौडेल, महिला नेत्री टीका थापा, जैमिनी ९ का अध्यक्ष भबिन्द्र थापा, जैमिनी १० का अध्यक्ष नरबहादुर थापा लगाएतका नेताहरुको आतिथ्यता रहेको थियो।
जैमिनीको शिर हाँडिकोट टापुमा ५०० बढी युवाहरू बिचमा सम्पन्न वनभोज कार्यक्रमलाई जैमिनी नगर सचिव सुरेश रानाले सञ्चालन गर्नुभएको थियो । कार्यक्रमको अध्यक्षता यम पुनले गर्नु भएको थियो भने नगर सदस्य खगेन्द्र थापाले स्वागत गर्नु भएको थियो ।कार्यक्रममा रक्तिमका गितमा नाचगान गरि युवाहरूले मनोरञ्जन समेत गरेका थिए ।
