काठमाडौं । नेपाल कम्युनिष्ट पार्टी (मसाल) ले स्वनाम साथीको निधनप्रति गहिरो दुःख प्रकट गरेको छ । वरिष्ठ वामपन्थी नेता स्वनाम साथीको शुक्रबार साँझ निधन भएको थियो ।
महामन्त्री मोहनविक्रम सिंहले शनिबार शोक वक्तव्य प्रकाशित गरी ‘स्वनाम साथी नेपाली कम्युनिस्ट आन्दोलनको एक मिलनसार, इमान्दार, स्वच्छ र सक्रिय व्यक्तित्व हुनुहुन्थ्यो’ भन्नुभएको छ ।
सिंहले स्वनामको मृत्युबाट एक असल मित्र गुमाएको बताउँदै त्यसले धेरै दुखित बनाएको बताउनुभएको छ ।
यस्तो छ, शोक वक्तव्य
का. शसी शेरचन(स्वनाम साथी)को ७० वर्षको उमेरमा आज मृत्यु भएको छ । हामीले उहाँको मृत्युप्रति गहिरो दुःख व्यक्त गर्दछौँ र सन्तप्त परिवारजनप्रति हार्दिक समवेदना प्रकट गर्दछौँ ।
का. स्वनाम साथी लामो समयदेखि नेपाली कम्युनिस्ट आन्दोलनमा क्रियाशील रहँदै आउनुभएको थियो । उहाँ २०५९ सालमा ने.क.पा.(मसाल) र नेकपा(एकताकेन्द्र) बीच भएको हाम्रो एकिकृत पार्टीको केन्द्रीय प्रवक्ता समेत हुनुभएको थियो । पछि २०६३ सालमा भएको पार्टी विभाजनमा उहाँ एकताकेन्द्रमा सामेल हुनुभएको थियो ।
का. स्वनाम साथी नेपाली कम्युनिस्ट आन्दोलनको एक मिलनसार, इमान्दार, स्वच्छ र सक्रिय व्यक्तित्व हुनुहुन्थ्यो । उहाँले निरन्तर रुपमा कम्युनिस्ट आन्दोलनमा प्रतिवद्ध रहेर योगदान दिने कोशिस गर्नुभयो । उहाँले विसंगतिपूर्ण प्रवृत्तिका विरुद्धको संघर्ष अन्तिम समयसम्म कायम राख्नुभयो । उहाँ प्रलोभनबाट मुक्त एक साधकी व्यक्तित्व हुनुहुन्थ्यो । उहाँको मृत्युबाट हामीले एक असल मित्र गुमाएको महशुस गरेका छौँ र त्यसले हामीलाई धेरै दुखित बनाएको छ ।
कम्युनिस्ट आन्दोलनका मूल्य र मान्यतालाई दृढतापूर्वक आत्मसात गर्दै सर्वदा मानवताको पक्षमा काम गर्न सक्नु नै उहाँप्रतिको सच्चा सम्मान हुनेछ । हामीले त्यो अभिभारा पूरा गर्ने प्रयास गर्नुपर्दछ ।
अन्तमा का. स्वनाम साथीप्रति हार्दिक श्रद्धाञ्जली व्यक्त गर्दछौँ ।
२०७७ पौष ११ गते ।
मोहनविक्रम सिंह
महामन्त्री
