टेकराज भुसाल, अर्घाखाँची ।
राष्ट्रिय जनमोर्चाका केन्द्रीय सदस्य झविलाल थापाले प्रधानमन्त्री तथा नेपाल कम्युनिस्ट पार्टी (नेकपा) अध्यक्ष केपी शर्मा ओलीले सत्ता र शक्तिको आडमा संसद विघटन गरेको आरोप लगाउनु भएको छ ।
राजमो भूमिकास्थान नगरपालिकाको आयोजनामा भूमिकास्थानको धारापानीमा आइतबार आयोजित विरोध सभालाई सम्बोधन गर्दै थापाले प्रधानमन्त्री केपी ओलीले आफ्नो दलको विवाद मिलाउन नसकेर प्रतिनिधिसभा विघटन गरेको आरोप लगाउनुभएको हो । उहाँले प्रधानमन्त्रीको सो कार्य अप्रजातान्त्रिक एवं गम्भीर गल्ती भएको भन्दै राष्ट्रिय जनमोर्चाले तीव्र विरोध र भ्रर्त्सना गर्ने समेत बताउनु भयो ।
त्यस्तै, राजमो अर्घाखाँचीका जिल्ला अध्यक्ष थम्मन केसीले राजावादीहरूले संघीयताप्रति नेपाली जनताको घृणा देखेपछि संघीयता खारेज गर भन्ने गरेको अवसरवादी तरिकाबाट फाइदा उठाउन खोजेको तथ्य प्रष्ट पार्दै संघीयताप्रति जनताको वितृष्णाबाट राजतन्त्र फर्काउने कुचेष्टा गरेको बताउनुभयो ।
कार्यक्रमलाई राजमो नेता सागर केसी, नेकपा (मसाल) का जिल्ला प्रवक्ता पशुपति ढकाल, अखिल नेपाल महिला संघकी माधवा वेल्वासे लगायतले सम्बोधन गर्नुभएको थियो।
कार्यक्रममा राजमो जिल्ला सचिव तथा भूनपा– ४ का वडा अध्यक्ष बावुराम पन्थी, अखिल नेपाल टे«ड युनियन महासंघ (अन्टुक) का कृष्ण वन्जाडे, राजमो जिल्ला सल्लाहकार दिलदार हुसेन, अखिल नेपाल युवक संघका झविन्द्र चुदाली, युएई नेपाली एकता समाजका अजय केसी, प्रगतिशील पत्रकार संघका माधव खनाल र टेकराज भुसालको आतिथ्यता रहेको थियो।
कार्यक्रम राजमो भूमिकास्थान नगर समिति सदस्य नारायण भुसाल, नगर सल्लाहकार बुद्धिबहादुर थापाको स्वागत तथा नगर सदस्य भोजराज खनालको सञ्चालनमा सम्पन्न भएको थियो ।
