कपिलवस्तु । राष्ट्रिय जनमोर्चाले कपिलवस्तुका विभिन्न स्थानीय तहमा प्रतिगमनको खतर र संघीयता खारेजीका लागि विरोध कार्यक्रम जारी राखेको छ । यसै सन्दर्भमा शुक्रबार महाराजगञ्जमा विरोध सभा सम्पन्न भएको छ ।
‘राष्ट्रियता, गणतन्त्र, धर्म निरपेक्षताको रक्षा, संघीयताको खारेज गरौँ’ भन्ने मूल नाराकासाथ कोण सभाको आयोजना गरिएको हो । सभालाई राजमो जिल्ला सल्लाहकार तथा अखिल नेपाल ट्रेड युनियन महासंघ (अन्टुक) का केन्द्रीय सदस्य केरसिंह अदैले सम्बोधन गर्नुभएको थियो ।
त्यस क्रममा उहाँले हिजो दलहरुले संघीयताले गाउँ गाउँमा अधिकार दिन्छ, आफ्नो राज्य मिल्छ, गाउँ गाउँमा सिंहदरबार हुन्छ, समृद्धि हुन्छ भनेको स्मरण गराउँदै संघीयताले कर वृद्धि र महंगी बाहेक केही नदिएको बताउनुभयो । सभालाई राष्ट्रिय जनमोर्चा जिल्ला सदस्य केरसिंह पुनले पनि सम्बोधन गर्नुभएको थियो ।
रक्तिम सांस्कृतिक अभियानका कलाकारहरुले विभिन्न जनवादी गीत र नृत्य प्रस्तुत गरेको कार्यक्रमको अध्यक्षता राजमो शिवराज नगर समितिका सचिव बेगम बुढामगरले गर्नुभएको थियो ।
