प्युठान । राष्ट्रिय जनमोर्चाका केन्द्रीय सदस्य एवम् सुदूरपश्चिम प्रदेश इन्चार्ज मनोज भट्टले सत्ताधारी दलहरुकै कारण गणतन्त्र र धर्मनिरपेक्षता खतरामा पर्दै गएको बताउनुभएको छ । प्युठानको ऐरावतीस्थित पुरनठाँटी बजारमा राजमोले आयोजना गरेको विरोध सभालाई सम्बोधन गर्दै नेता भट्टले सत्ताधारी दलहरुले गणतन्त्रको धज्जी उडाएको बताउनुभयो ।
‘सत्ताधारी दलहरुको हर्कतले गणतन्त्रको धज्जी उडाउने काम गरेको छ’ भट्टले भन्नुभयो, ‘उनीहरुका जनविरोधी क्रियाकलाप देखेर राजावादीहरु फेरि उत्साहित हुन थालेका छन् । जनताले रछ्यानमा फालेको राजतन्त्र फेरि ब्युँताउने चेष्टा गरिरहेका छन् ।’
भट्टले बर्तमान सरकार र सत्तारुढ दलको झगडामा जनताका समस्याबारे कुनै एजेण्डा नभएको आरोप लगाउनुभयो । उनीहरुको झगडा केवल भागबण्डाका लागि मात्रै भएको भन्दै उहाँले जनता रोग, भोक र बेरोजगारीबाट तड्पिरहँदा सत्ताधारीहरु शक्ति संघर्षको जात्रा देखाइरहेको बताउनुभयो ।
यस्तै उहाँले नेपालमा संघीयतालाई काँध थाप्नेहरु अहिले पछुताएको भन्दै संघीयता खारेजीका लागि जनताले दबाब दिनुपर्ने उल्लेख गर्नुभयो ।
राष्ट्रिय जनमोर्चाले ‘गणतन्त्र, राष्ट्रियता र धर्मनिरपेक्षताको रक्षा गरौँ, संघीयता र भ्रष्टाचारको विरोध गरौँ’ भन्ने नाराका साथ देशैभरी विभिन्न कार्यक्रम गरिरहेको छ । सोही कार्यक्रम अन्तर्गत प्युठानमा पनि स्थानीयस्तरसम्म विरोध सभा सञ्चालन भइरहेका छन् ।
बुधबार आयोजित विरोध सभामा राजमो लुम्बिनी प्रदेश सदस्य तथा प्युठान जिल्ला समन्वय समितिका प्रमुख केशव आचार्य र अखिल (छैठौं) का जिल्ला उपाध्यक्ष रमेश विश्वकर्माले पनि सम्बोधन गर्नुभएको थियो ।
राजमो ऐरावती गाउँ समितिका अध्यक्ष नारायण प्रसाद श्रेष्ठको अध्यक्षता, जिल्ला सदस्य अर्जुन थापाको सञ्चालन र गाउँ समिति सचिव प्रेमप्रसाद आचार्यको स्वागत मन्तव्यबाट अघि बढेको सो कार्यक्रममा राजमो जिल्ला कोषाध्यक्ष कृष्ण श्रेष्ठ, अखिल नेपाल जनजाती सम्मेलनका जिल्ला अध्यक्ष एवं ऐरावती गाउँपालिका वडा नं ६ का वडाअध्यक्ष चन्द्रबहादुर राना, महिला संघका जिल्ला सदस्य सीता गैरे, किसान महासंघका जिल्ला सदस्य कर्णबहादुर रायमाझी लगायत नेताहरुको आतिथ्यता रहेको थियो ।
