काठमाडौं । सरकारले संवैधानिक परिषदसम्बन्धी अध्यादेश ल्याएको छ । बहुमतका आधारमा निर्णय गर्न मिल्ने गरी सरकारले ल्याएको अध्यादेशलाई मंगलबार राष्ट्रपति विद्यादेवी भण्डारीले सो अध्यादेश प्रमाणिकरण गर्नुभएको छ ।
सत्तारुढ दल नेपाल कम्युनिस्ट पार्टी (नेकपा) को आन्तरिक विवाद उत्कर्षमा पुगेका बेला सरकारले संवैधानिक परिषदसम्बन्धी अध्यादेश ल्याएको हो । मंगलबार बसेको मन्त्रिपरिषद् बैठकको सिफारिसका आधारमा राष्ट्रपति विद्यादेवी भण्डारीले मंगलबार अध्यादेश जारी गर्नुभएको हो ।
राष्ट्रपति भण्डारीले नेपालको संविधानको धारा ११४ को उपधारा (१) बमोजिम मन्त्रिपरिषद्को सिफारिसमा संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) अध्यादेश, २०७७ जारी गरेको राष्ट्रपतिको कार्यालयले जनाएको छ ।
आइतबार र मंगलबार बसेको संवैधानिक परिषदमा गणपुरक संख्या पुगेको थिएन । नेकपाका अध्यक्ष प्रचण्डका विश्वासपात्र मानिने सभामुख अग्निप्रसाद सापकोटा बैठकमा नगएपछि गणपुरक संख्या नपुगेको हो ।
संवैधानिक परिषद्मा सदस्य रहने उपसभामुख पद रिक्त छ । एकजना उपस्थित नहुँदा गणपुरक संख्या नपुग्ने भएकोले अध्यादेशमार्फत सो व्यवस्था हटाएर उपस्थितमध्ये बहुमतका आधारमा निर्णय गरिने व्यवस्था गरिएको छ ।
