काठमाडौं । कोरोना संक्रमणका कारण मृत्यु भएका पूर्व सांसद कमानसिंह लामासँगको लेनदेनको अडियो बाहिरिएपछि नेकपाका प्रवक्ता नारायणकाजी श्रेष्ठ चौतर्फी विवादमा मुछिनुभएको छ ।
सत्तारुढ नेकपामा ओली पक्षले नारायणकाजीको खेदो खनिरहेको छ भने प्रचण्ड पक्ष बचाउमा जोडबल गरिरहेका छ । सामाजिक सञ्जालको तारो बनेका नारायणकाजीलाई नेकपाकै शीर्ष तहका नेताहरुले कटाक्ष गर्न थालेका छन् ।
कमानसिंह लामाको नारायणकाजी श्रेष्ठसँग लेनदेन विवाद खुलेपछि उपप्रधानमन्त्री एवं नेकपाका सचिवालय सदस्य ईश्वर पोखरेललेसमेत श्रेष्ठमाथि कटाक्ष गर्दै सामाजिक सञ्जालमा स्ट्याटस लेख्नुभएको छ ।
पोखरेलले लेख्नुभएको छ, ‘कमरेड कमानसिंह लामा अब हामीबीच रहनु भएन । हार्दिक श्रद्धान्जली । तर उहाँले आफू सम्वद्ध कम्युनिष्ट पार्टीलाई ‘अझ यसमा आवद्ध कम्युनिष्ट आदर्श’ को कुरा गरेर नथाक्नेहरूका लागि चुनौतीपूर्ण प्रश्न गरेर जानुभएको छ। अलविदा कमरेड कमानसिंह लामा !’
कमरेड कमानसिंह लामा अब हामीविच रहनु भएन ! हार्दिक श्रद्धान्जली ! तर वहाँले आफू सम्वद्ध कम्युनिष्ट पार्टीलाई – अझ यसमा आवद्ध ‘ कम्युनिष्ट आदर्श’ को कुरा गरेर नथाक्नेहरूका लागि चुनौतीपूर्ण प्रश्न गरेर जानुभएकोछ। अलविदा कमरेड कमानसिंह लामा !
— Ishwar Pokhrel (@IshwarPokhrel) December 10, 2020
तर, नारायणकाजीमाथि लागेको आरोपको पार्टीका अध्यक्ष पुष्पकमल दाहालले भने पुरै बचाउ गर्नुभएको छ । आइतबार बसेको स्थायी कमिटिको बैठकमा प्रचण्डले लामा र हाइड्रोपावर प्रोजेक्टसँग सम्बन्धित समान्य विवादमा पार्टीका प्रवक्तालाई अनावस्यक रुपमा मुछेर प्रचार गरिएको भन्दै आपत्ति जनाउनुभएको छ ।
प्रचण्डलाई उदृत गर्दै प्रवक्ता श्रेष्ठले भन्नुभयो, ‘बैठकमा अध्यक्ष प्रचण्डले लामाको निधनबाट शोकाकुल र दुखित रहेको यस घडिमा लामा र हाइड्रोपावर प्रोजेक्टसँग सम्बन्धित समान्य विवादमा पार्टीका प्रवक्तालाई अनावश्यक रुपमा मुछेर जुन प्रचार भएको छ त्यो प्रचारको भ्रममा नपर्न र त्यस्तो प्रचारमा नलाग्न पनि अनुरोध गर्नुभएको छ । बैठकलाई उहाँले आफूले समेत लामा र सम्बन्धित हाइड्रोपावर प्राजेक्टको व्यक्तिलाई सँगै राखेर पनि कुरा गरेको र प्रवक्ताले तपाईहरु सबै आफ्नै साथीहरु भएकोले मिल्नुहोस भन्ने बाहेक अरु कुनैपनि कुरा नभएकोले त्यस प्रकारको भ्रममा नपर्न पनि अनुरोध गर्नुभयो ।’
विवादबीच बसेको र अध्यक्ष एवं प्रधानमन्त्री केपी ओलीले बहिष्कार गरेको नेकपा स्थायी समितिको आइतबारको बैठक लामाको निधनमा शोक प्रस्ताव पारित गर्दै पुष १ गतेसम्मका लागि स्थगित भएको छ । लामा नेकपाका केन्द्रीय सदस्य हुनुहुन्थ्यो ।
