जगदीश ढकाल, बाँके ।
राष्ट्रिय जनमोर्चाका पूर्व महासचिव एवं पूर्व सांसद हरि आचार्यले सरकार भ्रष्टाचार र माफियातन्त्रमा फँसेका कारण प्रतिगामीहरु खेल्ने मौका पाएको बताउनुभएको छ ।

बिहीबार बाँकेको खजुरामा आयोजित विरोधसभालाई सम्बोधन गर्दै नेता आचार्यले गणतन्त्रका लागि लडेका शक्तिहरु एकजुट हुन नसकेका कारण र सरकार अकर्मण्यतामा फसेका कारण उत्पन्न भएको जनआक्रोशमा पुनरुत्थावादी तत्वहरुले टाउको उठाउन खोजेको आरोप लगाउनुभयो ।

हिजोका गाईकाण्ड, गलैंचा काण्ड, नमिता–सुनिता काण्ड, मुर्ति चोरी काण्ड जस्ता काण्डहरुले बदनाम पञ्चायती व्यवस्थाको कालरात्री जनताले सम्झिराखेको उहाँले बताउनुभयो ।

राजावादीहरुले गर्ने संघीयताको विरोध र राजमोले गर्ने संघीयताको विरोधी आन्दोलनबीच मेल नखाने उहाँको भनाई थियो । उहाँले संघीयताको विकल्प राजतन्त्र नभै विकेन्द्रीकरणमा आधारित स्थानीय स्वायत्त शासन सहितको एकात्मक राज्यव्यवस्था भएको स्पष्ट पार्नुभयो ।

राष्ट्रियताको मामिलामा सरकार प्रचारमूखी मात्र देखिएको र ठोस कदम चाल्न नसकेकोले भन्दै त्यसको लागि तत्काल पहल गर्न आग्रह गर्नुभयो ।

बिहीबार राष्ट्रिय जनमोर्चा बाँकेले जिल्लाका विभिन्न स्थानमा विरोध सभाको आयोजना गरेको थियो । ‘गणतन्त्र, धर्म निरपेक्षताको रक्षा गरौं, संघीयता र भ्रष्टाचारको विरुद्ध संघर्ष गरौं’ भन्ने मूल नाराका साथ खजुरा, नेपालगञ्ज र कोहलपुरमा विरोध सभाको आयोजना गरिएको हो ।

राजमो बाँकेका अध्यक्ष भिमप्रसाद देवकोटाको अध्यक्षतामा सम्पन्न खजुराको सभामा अखिल नेपाल महिला संघकी वैकल्पिक केन्द्रीय सदस्य पूर्णकला भण्डारी, अखिल नेपाल युवक संघका जिल्ला अध्यक्ष भरत खड्काले पनि सम्बोधन गर्नुभएको थियोे भने अखिल (छैठौं) का जिल्ला अध्यक्ष नमराज चन्दले सञ्चालन गर्नुभएको थियोे ।

यसैगरी, नेपालगञ्जमा आयोजित बिरोधसभालाई सम्बोधन गर्दै अखिल नेपाल किसान महासंघका महासचिव तुलसीराम साप्कोटाले सरकारी संयन्त्रहरु भ्रष्टाचारमा लिप्त भै गरिब किसान, मजदुरहरुका समस्या समाधानमा उदासीन रहेको भन्दै रोश प्रकट गर्नुभयो ।

अखिल नेपाल युवक संघका महासचिव कृष्णराज पाण्डेले गणतन्त्रको विकल्प राजतन्त्र नभै नयाँ जनवाद र समाजवाद भएको र त्यसको नेतृत्व नेकपा (मसाल) ले गर्न सक्ने बताउनु भयो ।  सभाको सञ्चालन लोकबहादुर रानाले गर्नुभएको थियो ।

यता, भरत खड्काले सञ्चालन गर्नुभएको कोहलपुरको सभामा अखिल नेपाल युवक संघका महासचिव कृष्णराज पाण्डे, राजमो जिल्ला अध्यक्ष भिमप्रसाद देवकोटा र अनेम संघकी जिल्ला उपाध्यक्ष पार्वती कार्कीले पनि सम्बोधन गर्नुभएको थियोे ।