काठमाडौँ । अखिल नेपाल किसान महासङ्घ (अप्फा) ले भारत चलिरहेको किसान आन्दोलनप्रति समर्थन र ऐक्यबद्धता प्रकट गरेको छ । किसान महासङ्घ (अप्फा) का अध्यक्ष भैरवराज रेग्मीको हस्ताक्षरमा २०७७ मङ्सिर २४ गते जारी प्रेसवक्तव्यमार्फत ऐक्यबद्धता जनाइएको हो ।

भारतमा चलिरहेको किसान आन्दोलनको सन्दर्भमा किसानमाथि मात्रै होइन, विपक्षी दलहरूमाथि समेत दमन गरिएको भत्सर्ना गरिएको सो वक्तव्यको पूर्ण पाठ यस्तो छ–

“अहिले भारतमा किसानहरूको आन्दोलन चलिरहेको छ । यस आन्दोलनप्रति अखिल नेपाल किसान महासङ्घ (अप्फा) समर्थन र ऐक्यबद्धता प्रकट गर्दछ । उक्त आन्दोनलको सफलताको कामना गर्दछ ।

२०७३ सालमा काठमाडौँमा सम्पन्न भएको प्रथम विश्व किसान सम्मेलनको आयोजना नेपालले गरेको थियो र त्यसको आयोजक अखिल नेपाल किसान महासङ्घ (अप्फा) थियो । दोस्रो विश्व किसान सम्मेलन बङ्गलादेशले गर्ने निर्णय भएता पनि कोभिड–१९ को कारणले सम्भव हुन सकिरहेको छैन । नेपालको काठमाडौँमा सम्पन्न भएको उक्त सम्मेलनमा विश्वका धेरै राष्ट्रका किसान सङ्घ–सङ्गठनको समर्थन, सहयोग र ऐक्यबद्धता रहेको थियो । विश्वभरि नै उपेक्षित किसानको भौतिक सहभागिताका लागि भिसा, आर्थिक सङ्कटका बाबजुद पनि जर्मनी, बङ्गलादेश र भारतबाट ठुलो सङ्ख्यामा भौतिक उपस्थिति जनाएर काठमाडौँको अन्तर्राष्ट्रिय स्तरको प्रदर्शनसहित सम्मेलन सफल भएको थियो । बङ्गलादेशमा हुने दोस्रो विश्व किसान सम्मेलनमा पनि यही प्रकारको उच्च ऐक्बद्धता जाहेर हुने छ भन्ने विश्वभरिका किसानहरू प्रतिक्षारत छन् । प्रथम विश्व किसान सम्मेलन सम्पन्न भएपश्चात् यसमा संलग्न किसान सङ्घ–सङ्गठनले आआफ्ना सङ्गठनमार्फत विश्वभरि चलिरहेका किसान आन्दोलनप्रति ऐक्यबद्धता प्रकट गर्दै आइरहेका छन् । भारतको अहिले चलिरहेको आन्दोलनलाई पनि कोअर्डिनेटरको नाताले नेपालले ऐक्यबद्धता प्रकट गर्दछ ।

विश्वका विकसित पुँजीवादी र अर्धसामन्ती देशमा सम्पूर्ण किसानको साम्राज्यवादी नवउपनिवेशवादी शोषणले पिल्सिरहेका छन् । विश्व किसान सम्मेलन कोअर्डिनेसन कमिटी यो विश्लेषणमा एकमत छ । विश्वका विकसित मुलुकहरू अमेरिका, ल्याटिन अमेरिका, युरोपियन युनियन, अस्टे«लियाका देशलगायत देशमा समेत साम्राज्यको नवउपनिवेशवादी (न्यू कोलोनिज्म) को मारमा किसान पिल्सिरहेका छन् । यस प्रकार विश्वभरिका नवउपनिवेशवादको मारमा परेका किसानको एउटै आवाज छ : नवउपनिवेशवादबाट किसानहरूलाई मुक्त गर ।
आज दक्षिण एसियाका देशहरू नेपाल, भुटान, भारत, पाकिस्तान, बङ्गलादेश, श्रीलङ्का, मालदिभ्सका किसान यही नवउपनिवेशवादी शोषण, मुख्यतः भारतीय साम्राज्यवादको शोषणमा पिल्सिइरहेका छन् । स्वयम् भारत आफै साम्राज्यवादी देश भएकाले साम्राज्यवादी देशसँग प्रतिष्पर्धामा उत्रिन कोसिस गरिरहेको छ । आफ्नो देशमा साम्राज्यवादी एकाधिकार र पुँजीवादी कर्पोरेट कृषिक्षेत्रमा प्रवेश गराई किसानको हक–अधिकारलाई समाप्त पार्ने, भूमिहीन किसानलाई कृषिक्षेत्रबाट बेदखली गर्ने, साना र मध्यम किसानको भू अधिकारलाई समाप्त पारेर कर्पोरेट प्रणाली स्थापना गर्ने, कृषि उत्पादनमा किसानको हक–अधिकार छिनेर एकाधिकारवादी कर्पोरेट बजार प्रणाली कायम गरिरहेकाले करोडौँ किसान सडकमा फालिएका छन् । कर्पोरेट बैङ्कले किसानको ऋणमाथि ऋण थोपरेर बर्सेनि हजारौँको सङ्ख्यामा किसानहरू आत्महत्या गर्न बाध्य बनाइएका छन् । यसरी सम्पूर्ण कृषिक्षेत्रलाई साम्राज्यवादी कर्पोरेट प्रणालीमा रूपान्तरण गरेर किसानमारा नीति अवलम्बन गर्ने मोदी शासनकै विरुद्ध किसानहरू हलो–जुवा, ट्रयाक्टरको जुलुससहित भारतभरि प्रदर्शन गरिरहेका छन् । विपक्षी दलहरूले समेत समर्थन गरेको भारतको यो ऐतिहासिक किसान आन्दोलनमा विपक्षीलाई समेत थुन्ने, जेल हाल्ने, हाउस एरेस्ट गर्नेजस्ता गतिविधि बढाएर मोदी सरकार क्रुर दमनमा उत्रेको छ । भारतीय किसानको यो आन्दोलनलाई नेपालका किसानहरू समर्थन गर्दछन् र साम्राज्यवादीको नवउपनिवेशवादी नीतिको विरुद्ध विश्व किसान आन्दोलनप्रति ऐक्यबद्धता प्रकट गर्दछन् ।

नेपाल पनि एक अर्धसामन्ती र अर्धऔपनिवेशिक देश भएकाले नेपाली किसान सामन्तवाद र साम्राज्यवादबाट पिल्सिरहेका छन् । देशमा राजनैतिक रूपमा पुँजीवादी गणतन्त्र आएता पनि नेपालको अर्धसामन्ती स्वरूपमा परिवर्तन आएको छैन; र, राज्यको स्वरूप प्रतिक्रियावादी छ । यो प्रतिक्रियावादी राज्यमा आवधिक रूपमा शासन गर्ने वामपन्थी मार्काका पार्टीहरूको ढुलमूल, अवसरवादी र सम्झौतापरस्त चरित्रका कारणले यो प्रतिक्रियावादी राज्य संरचनालाई फेर्ने दिशामा उनीहरूको भूमिका अत्यन्त कमजोर रहने गरेको र यही यथास्थितिमा आफ्नो शासन व्यवस्था सञ्चालन गर्न साम्राज्यवादी, एकाधिकार पुँजीवादी व्यवस्थासँग साँठगाँठ गरेर शासन व्यवस्था चलाइरहेकाले किसानका  समस्या झन् जटिल बन्दै गइरहेको छ; र, कृषि क्षेत्रमा एकाधिकार पुँजीवाद र कर्पोरेट प्रणाली छिर्न थालेको छ । यसका लागि अखिल नेपाल किसान महासङ्घ (अप्फा) ले एकल सङ्घर्ष अगाडि बढाउनुका साथै संयुक्त किसान आन्दोलन पनि अगाडि बढाइरहेको छ ।
यस प्रकार नेपाललगायत विश्वका किसानले क्रमशः भारतीय किसानको आन्दोलनलाई ऐक्यबद्धता प्रकट गरिरहेका छन् र आन्दोलनको सफलताको कामना गरिरहेका छन् ।”