नवराज पौडेल, कपिलवस्तु ।
कपिलवस्तुको विजयनगर गाउँपालिकामा राष्ट्रिय जनमोर्चाको भेला सम्पन्न भएको छ । शनिबार शंकरपुरमा सम्पन्न भेलाले गोपाल सुनारको अध्यक्षतामा विजयनगर गाउँसमिति पुनर्गठन गरेको छ ।
भेलालाई राष्ट्रिय जनमोर्चाका जिल्ला कोषाध्यक्ष चेतनारायण खनाल, जिल्ला सल्लाहकार तथा अखिल नेपाल ट्रेड युनियन महासंघ (अन्टुक) का केन्द्रीय सदस्य तथा जिल्ला अध्यक्ष केरसिंह अदै, अखिल नेपाल यातायात मजदुर संघका जिल्ला अध्यक्ष नागराज योगी, तराई मधेश जनवादी मोर्चा विजयनगर गाउँ समितिका अध्यक्ष खडेरु पासी, राजमो विजयनगर गाउँपालिका वडा नं १ का अध्यक्ष प्रभु यादवले सम्बोधन गर्नुभएको थियो ।
सम्बोधनका क्रममा नेताहरुले राष्ट्रिय जनमोर्चाको नीति तथा कार्यक्रम देश र जनताको पक्षमा भएको तथा जनताले पनि बुझ्दै गएको उल्लेख गर्दै राष्ट्रिय जनमोर्चाप्रति जनताको आकर्षण बढेको बताउनुभयो । उहाँहरुले संघीयता फेल भइसकेको तर संघीयताको विकल्प राजतन्त्र हुन नसक्ने बताउँदै विकेन्द्रीकरण गरेर स्थानीय तहलाई अधिकार सम्पन्न बनाउनुपर्ने, प्रदेश सरकार खारेज गरेर सो रकम विकास निर्माण र कोरोना भाइरस उपचारमा लगाउनु पर्ने आवश्यकतामा जोड दिनुभयो ।
भेलाले गोपाल सुनारको अध्यक्षतामा १५ सदस्सीय राजमो विजयनगर गाउँपालिका समिति पुनर्गठन गरेको छ । जसको उपाध्यक्ष पतेस्वरी यादव, सचिव गोविन्द परिवार, सहसचिव प्रभु यादव, कोषाध्यक्ष राम समारे धोबी तथा सदस्यहरूमा रामसेवक कोरी, हिरालाल तेली, उदयराज चौधरी, पृथ्वीराज लोहार, सोमना रहिदास, सूर्यबहादुर जिसी, मनिषा कोरी, धनिराम खटिक चयन हुनुभएको छ । यस्तै भेलाले नागराज योगी, खदेरू पासी, र पशुपति जयसवाललाई सल्लाहकार चयन गरेको छ ।
भेला पछिको बैठकले गाउँपालिकाको ७ वटै वडामा कमिटी गठन भएको र सबै वडामा पौष महिनामा भेला तथा बैठक गर्ने निर्णय गरेको छ । साथै यही मंसिर २५ गते गाउँपालिका स्तरीय प्रशिक्षण गर्ने निर्णय पनि गरिएको छ ।
गोपाल सुनारको अध्यक्षता सम्पन्न भेलाको सञ्चालन गोविन्द परिवार र स्वागत उदयराज चौधरीले गर्नु भएको थियो ।
