काठमाडौं । सरकारले कोरोना संक्रमित पत्ता लगाउन काठमाडौं उपत्यकामा ‘एन्टिजेन’ परीक्षण सञ्चालन गरेपछि एक दिनमै सयौं जनाको परीक्षण हुन थालेको छ । आधा घण्टामै नतिजा आउन सक्ने यो विधिबाट सोमबार मात्रै उपत्यकामा साढे सात सय जनाको कोरोना परीक्षण गरिएको छ ।
इपिडिमियोलजी तथा रोग नियन्त्रण महाशाखाका निर्देशक डा. वासुदेव पाण्डेका अनुसार तुरुन्तै नतिजा आउने तथा फिल्डमै धेरै जनाको परीक्षण गर्न सकिने विधि एन्टिजेन जाँच सुरु गरिएको हो ।
डा. पाण्डेका अनुसार सुरुको दिन सोमबार साढे ७ सय जनाको एन्टिजेन परीक्षण गरिएको मा ४१ जनाको रिपार्ट पोजिटिभ आएको थियो । कोरोना संक्रमित पुष्टि भएकालाई स्थानीय तहको समन्वयमा आइसोलेसनमा पठाइएको छ ।
पहिलो दिन चाबहिल, मित्रपार्क, विशालनगरजस्ता हटस्पट ठाउँमा परीक्षण गरिएकोमा आज कुलेश्वर, कलंकी, कोटेश्वरलगायत क्षेत्रमा एन्टिजेन परीक्षण गरिँदै छ । हिजो मंगलबार भने परीक्षण गरिएन ।
एन्टिजेन परीक्षण कस्तो हो ?
यो छिटो छरितो रूपमा कोरोना भाइरस पत्ता लगाउने एउटा विधि हो। यसका लागि पनि नाक र घाँटीबाट स्वाब लिनुपर्छ । तर कुनै प्रयोगशाला वा विशेष उपकरण चाहिँदैन । फिल्डमै गर्न सकिन्छ।
डा. पाण्डेका अनुसार सानो थर्मोमिटर भन्दा अलि मोटो लाम्चो र्यापिड एन्टिजेन किटमा एक थोपा स्वाब राख्दा लाइन आयो भने व्यक्तिमा कारोनो संक्रमित छ भन्ने भन्ने थाहा हुन्छ ।
पीसीआर परीक्षण गर्दा नतिजा थाहा पाउन ४८ देखि ७२ घण्टासम्म लाग्छ भने यसबाट करिब आधा घण्टामै थाहा पाउन सकिने डा. पाण्डेको भनाइ छ ।
