शुक्रराज भण्डारी, दाङ ।
राष्ट्रिय जनमोर्चाका कार्यकारी अध्यक्ष रश्मिराज नेपालीले नेपालमा संघीयता पूर्ण रूपमा असफल भएको बताउनु भएको छ । राज्यको आफ्नो श्रोतबाट कर्मचारीको खर्च समेत धान्न नसक्ने अबस्थामा संघीयताले नेपाली जनतालाई बोझ मात्र थोपरेको बताउँदै यसको खारेजीका लागि नेपाली जनता आन्दोलनमा आउनुको विकल्प नरहेको बताउनु भयो ।
भारतीय हेपाहा प्रवृत्तिको स्मरण गर्दै कार्यकारी अध्यक्ष नेपालीले नेपालका राज्य सञ्चालकहरूको सत्तास्वार्थ केन्द्रित र अवसरवादी चरित्रका कारण नेपालको राष्ट्रियता कमजोर भएको बताउनु भयो ।
राष्ट्रिय जनमोर्चा दाङका अध्यक्ष गणेश आचार्यको अध्यक्षतामा भएको विरोध सभाका प्रमुख अतिथि नेपालीले विकास र विज्ञानको प्रभाव बढी भएको ठाउँमा कोरोनाको प्रभाव पनि बढी मात्रामा देखिएको बताउनुभयो । उहाँले गाउँमा भन्दा शहरमा कोरोना संक्रमणको दर उल्लेख्य रहेको बताउँदै हालसम्म यसको औषधि पत्ता नलागेकाले व्यक्ति स्वयम् सजग हुनुपर्ने बताउनु भयो ।
कोरोना उपचारका लागि आवश्यक उपकरण खरिदका बेला भएको बेथिति तथा विभिन्न बस्तु खरीदमा भएको भ्रष्टाचार अविलम्ब रोक्न र यस्ता गतिविधिको निष्पक्ष छानबिनका लागि पनि उहाँले माग गर्नुभएको छ ।
विरोध सभामा जनमोर्चाका लुम्बिनी प्रदेश सचिवालय सदस्य रामबहादुर जिएम, अखिल नेपाल जनजाति सम्मेलन जिल्ला अध्यक्ष रेशम विसी, जातीय समता समाजका जिल्ला अध्यक्ष टीका बिक, अखिल नेपाल महिला संघ जिल्ला अध्यक्ष पुर्णिमा आचार्य लगायतले सरकारको काम कारबाहीको आलोचना गर्नुभयो । कार्यक्रमको सञ्चालन जिल्ला सहसचिव ऋषिराम पौडेलले गर्नुभएको थियो ।
