गणेश अधिकारी, पोखरा ।
संघीयताको विरोधमा देशव्यापी भएको विरोध प्रदर्शनका क्रममा राष्ट्रिय जनमोर्चा कास्कीले पनि विरोध सभा सम्पन्न गरेको छ । ‘संघीयता खारेज गरियोस्, कोरोना भाइरसका विरुद्ध प्रभावकारी कदम चालियोस्’ भन्ने नाराका साथ पोखरामा ब्यानर र प्ले कार्ड लिएर प्रदर्शन गरिएको हो ।

कार्यक्रमलाई सम्बोधन गर्दै राजमो गण्डकी प्रदेश अध्यक्ष शंकर बरालले बर्तमान सरकार भारतीय साम्राज्यवाद र अमेरिकी साम्राज्यवादको घेराबन्दीमा परेको कारण देशको स्वाधीनतामा बारम्बार हमला भैरहेको अरोप लागाउनु भयो । उहाँले सरकार जनताका समस्या समाधान गर्न पट्टि ध्यान नदिएको, कोभिड १९, का बिरामीलाई पर्याप्त मात्रामा स्वास्थ्य उपचार नपाएको सरकारका गलत क्रियाकलापले गर्दा प्रतिगामी शक्तिहरुले टाउको ठडाउने मौका पाएको बताउनुभयो।

नेता बरालले संघीयता खारेजी गर्दै विदेशी हस्तक्षेप बन्द गर्न र गणतन्त्र र राष्ट्रियताको रक्षाका लागि थप सघर्ष गर्नुपर्ने बेला आएको बताउनुभयो ।

कार्यक्रममा नेकपा (मसाल) का जिल्ला प्रवक्ता चन्द्रबहादुर केसी, राजमो जिल्ला अध्यक्ष रबिमोहन ढकाल, अखिल नेपाल ट्रेड युनियन महासंघका केन्द्रीय सदस्य नामबहादुर बाठा मगर, अखिल नेपाल उद्योग ब्यापार संघका केन्द्रीय सदस्य ढाकाराम पौडेल, अखिल (छैठौं) केन्द्रीय उपाध्यक्ष गणेश अधिकारीले सम्बोधन गर्नुभएको थियो ।

राजमो जिल्ला सहसचिव बिक्रम थापाले सञ्चालन गर्नुभएको थियो ।