वीरेन्द्रनगर । राष्ट्रिय जनमोर्चाका महासचिव जनकराज शर्माले अहिले देखा परेको बेथिति र अराजकता सङ्घीयताकै कारण उत्पन्न भएको बताउनुभएको छ । राष्ट्रिय जनमोर्चा सुर्खेतको आयोजनामा मङ्सिर १४ गते सदरमुकाम वीरेन्द्रनगरमा आयोजित विरोधसभालाई सम्बोधन गर्दै उहाँले सो अभिव्यक्ति दिनुभएको हो ।
‘सङ्घीयताकै कारण बेथिति जन्मिएको हो’ आफ्नो भनाइलाई विस्तार गर्दै महासचिव शर्माले भन्नुभयो– ‘सङ्घीयताले राज्यकोषको अत्यधिक आय प्रशासनिक खर्चमै गएको छ । यहाँसम्म कि विकास निर्माणका बजेटसमेत कटौती हुँदै गएको छ । अर्कातिर, प्रशासनिक खर्च सञ्चालन गर्न जनतामाथि अत्यधिक करको बोझ लादिएको छ ।’
कोराना सङ्क्रमणको सामना तत्कालको प्राथमिक काम भएको बताउँदै उहाँले सङ्घीयता खारेज गरेर त्यसबाट बचेको रकम यस महामारीको नियन्त्रणमा लगाउनुपर्ने बताउनुभयो । ‘सात वटा सङ्घीय प्रादेशिक संरचना खारेज गर्नुपर्दछ; र, त्यसबाट वचत हुने सम्पूर्ण रकम कोभिड–१९ जस्तो महामारी नियन्त्रणमा लगाउनुपर्दछ’ उहाँले अहिलेको सङ्कटपूर्ण घडीमा राजनीतिक पार्टीहरूले हिम्मतका साथ सङ्घीयता खारेजी गर्नेतर्फ लाग्नुपर्ने बताउनुभयो ।
‘कोभिड–१९ महामारी जारी रहेकै बेलामा समेत स्वास्थ्य सामग्रीमा भ्रष्टाचारको गन्ध आउनुले हाम्रो देशको शासनसत्तामा कति चरम रूपमा बेथिति र अराजकता रहेछ भन्ने पुष्टि भएको छ’ महासचिव शर्माले अगाडि भन्नुभयो– ‘यस्तो अमानवीय कृत्य गर्ने जोकोहीलाई तत्कालै कडा सजाय दिइनुपर्दछ ।’ त्यसका लागि उहाँले भ्रष्टाचारका घटनाको तत्कालै उच्चस्तरीय छानबिन हुनुपर्ने आवश्यकतामा जोड दिनुभयो ।
विरोधसभामा राष्ट्रिय जनमोर्चाका केन्द्रीय सदस्य रत्नविक्रम प्यासी, राजमो कर्णाली प्रदेश समितिका कोषाध्यक्ष धनप्रसाद देवकोटा र नेकपा (मसाल) सुर्खेतका प्रतिनिधि विष्णुप्रसाद शर्माले पनि सम्बोधन गर्नुभएको थियो ।
राजमो सुर्खेतका अध्यक्ष गोविन्दप्रसाद सुवेदीको अध्यक्षतामा अगाडि बढेको सो विरोधसभाको सञ्चालन जिल्ला सचिव लालबहादुर नेपालीले र स्वागत जिल्ला उपाध्यक्ष कृष्णा रावलले गर्नुभएको थियो ।
