शंकर प्रसाद पोख्रेल, गुल्मी ।
संघीयता खारेजीको माग गर्दै राष्ट्रिय जनमोर्चा गुल्मीले लुम्छा बजारमा विरोध प्रदर्शन गरेको छ । संघीताको खारेजी तथा कोरोना भाइरस रोकथाम र उपचारमा सरकारको असक्षमता एवं लापरवाही र भ्रष्टाचारको विरुद्धमा देशब्यापी विरोध प्रदर्शन अन्तर्गत गुल्मीमा पनि प्रदर्शन गरिएको हो ।
त्यस क्रममा आयोजित कोणसभामा राष्ट्रिय जनमोर्चा जिल्ला सचिव छबिलाल सर्तुङ्गीले सम्बोधन गर्दै नेपालमा अहिले ब्यापक भ्रष्टाचार बढेको र त्यस्का विरुद्ध सम्पूर्ण नेपालीहरु एकजुट भएर बिरोध गर्नुपर्ने बताउनु भयो । उहाँले नेपालमा संघीयता असफल भैसकेकोले संघीयता खारेज गरेर त्यसको खर्चबाट कोरोना भाइरसमा लगानी गर्न्नुपर्ने विचार व्यक्त गर्नुभयो ।
त्यस्तै, नेकपा (मसाल) का जिल्ला प्रवक्ता ओमेन्द्र कुँवरले नेपालका कलकारखानाहरु बेचेर खाने कांग्रेस जस्तै अहिले देशमा नेतृत्व गरेको नेकपा सरकार पनि उही बाटोमा गएको आरोप लगाउनु भयो ।
राजमो लुम्बिनी प्रदेश सदस्य रामेश्वर खत्रीले नेपाली जनताले सही र गलत राजनीति पार्टी छुट्टाउनुपर्ने बेला आएको बताउँदै अहिलेका राजनीतिक पार्टीको व्यवहारले गर्दा देशमा प्रतिगामी शक्तिहरु सल्बाएको समेत बताउनु भयो । कार्यक्रमको सञ्चालन राष्ट्रिय जनमोर्चाका जिल्ला सदस्य हरि न्यौपानेले गर्नुभएको थियो ।
