काठमाडौं । नेपालमा कोरोना संक्रमणबाट सरदर एक घण्टामा एक जनाको मृत्यु हुन थालेको छ । पछिल्लो २४ घण्टामा २३ को मृत्यु भएको छ ।

यसअघि बुधबार २४ जनाको मृत्यु भएको थियो । योसँगै कोरोना संक्रमणबाट मृत्यु हुनेको संख्या १ हजार ४१२ पुगेको स्वास्थ्य तथा जनसंख्या मन्त्रालयले जनाएको छ ।

यस्तै, पछिल्लो २४ घण्टामा थप १ हजार ६१४ जनामा कोरोना भाइरसको संक्रमण देखिएको छ । मन्त्रालयले बिहीबार दिएको जानकारी आनुसार थप १ हजार ६१४ जनामा कोरोना संक्रमण पुष्टि भएको हो ।

मन्त्रालयका अनुसार योसँगै नेपालमा कोरोना संक्रमितको संख्या २ लाख २७ हजार ६४० पुगेको छ । देशभर सक्रिय संक्रमितको संख्या १६ हजार ७९३ रहेको छ।

त्यस्तै पछिल्लो २४ घण्टामा थप १ हजार ४३७ जना कोरोना संक्रमित निको भएका छन् । योसँगै कोरोना निको हुनेको संख्या २ लाख ९ हजार ४३५ पुगेको छ ।